தேனி மாவட்டம் உத்தமபாளையம், போடி வட்டத்திலுள்ள மானாவாரி நிலங்களுக்கு ஆற்றுப்பாசனம் கிடைக்க வழியில்லாததால் மழையை மட்டுமே நம்பியுள்ளன. இந்த நிலங்கள் பயன்பெறும் வகையில் முல்லைப் பெரியாறு அணையின் தலைமதகிலிருந்து 40.80 கி.மீ தூரத்திற்கு கால்வாய் வெட்டி கூடலூர், கம்பம் பள்ளத்தாக்கு, பாளையம், தேவாரம் ஆகிய ஊர்களின் வழியாக சுத்தகங்கை ஓடைக்கு முல்லைப் பெரியாறு அணையின் உபரி நீரைக் கொண்டுசெல்லும் திட்டம்தான் 18ஆம் கால்வாய் திட்டம்.
அணையின் நீர்மட்டம் உயரும் போதெல்லாம் இந்தக் கால்வாய் வழியாக தண்ணீரைத் திறப்பதற்கு தமிழ்நாடு அரசு ஆணை பிறப்பித்துள்ளது. இக்கால்வாய் மூலம் வெளியேற்றப்படும் நீரால் உத்தமபாளையம், போடி வட்டத்திலுள்ள 44 கண்மாய்கள் நிரம்பும். இதன் மூலம் 4614.25 ஏக்கர் நிலங்கள் பாசன வசதி பெறும்.
கடந்த சில வாரங்களாக பெரியாறு அணையின் நீர்ப்பிடிப்பு பகுதிகளில் மழை பெய்ததால் நீர்மட்டம் உயர்ந்தது. இதனால் 18ஆம் கால்வாய் திட்டத்தை செயல்படுத்துமாறு கடந்த சில வாரங்களாக விவசாயிகள் அரசு அலுவலர்களிடம் வலியுறுத்தி வந்ததையடுத்து, இன்று காலை முதல் கால்வாயிலிருந்து தண்ணீரைத் திறக்க முதலமைச்சர் எடப்பாடி பழனிசாமி உத்தரவிட்டார்.
இதைத் தொடர்ந்து தேனி மாவட்டம் லோயர்கேம்ப்பில் உள்ள முல்லைப் பெரியாறு தலைமதகுப் பகுதியில் இன்று காலை மாவட்ட ஆட்சியர் பல்லவி பல்தேவ், மதகை இயக்கி தண்ணீரைத் திறந்து வைத்தார். அரசின் உத்தரவுப்படி வினாடிக்கு 98 கனஅடி தண்ணீர் வீதம், இன்னும் ஒரு மாதத்திற்கு (30 நாட்கள்) தண்ணீர் திறந்துவிடப்படும் எனத் தெரிவிக்கப்பட்டுள்ளது. இந்நிகழ்ச்சியில், 18ஆம் கால்வாய் விவசாய சங்கத்தினர், பொதுப்பணித் துறை அலுவலர்கள் ஆகியோர் கலந்துகொண்டனர்.
இதேபோல், பி.டி. ராசன், தந்தை பெரியார் கால்வாய்களின் 5146 ஏக்கர் பாசன நிலங்களான சின்னமன்னூர், சீலையம்பட்டி , தர்மபுரி, கோவிந்தாநகரம் உள்ளிட்ட 12 கிராமங்களுக்கு முல்லைப் பெரியாற்றில் இருந்து 100 கனஅடி வீதம் 120 நாட்களுக்கு தண்ணீர் திறந்து வைப்பதற்கான பணியை மாவட்ட ஆட்சியர் பல்லவி பல்தேவ் தொடங்கி வைத்தார்.
இதையும் படிங்க:முல்லைப் பெரியாறு அணை தொடர்பான ஆக்கிரமிப்பு வழக்கு; கேரள அரசுக்கு நோட்டீஸ்!
