'நாடாளுமன்றத்தில் கன்னிப்பேச்சிலேயே பிரதமர் மோடியை ஈர்த்தவர் ஓபிஆர்' - ஆர்.பி. உதயகுமார் புகழாரம்!

தேனி: தமிழ்நாட்டைச் சேர்ந்த ஒரேயொரு நட்சத்திரமான ரவீந்திரநாத் குமார்தான் நாடாளுமன்றத்தில் நமது ஜீவாதார உரிமைகளை சிங்கக்குட்டி போல எழுப்பிவருகிறார் என்று அமைச்சர் ஆர்.பி. உதயகுமார் பெருமிதத்துடன் தெரிவித்துள்ளார்.

தேனி மாவட்ட அதிமுக அம்மா பேரவையுடன் பெரியகுளம் அருகே உள்ள ரோஸி வித்யாலயா பள்ளி இணைந்து, மறைந்த முதலமைச்சர் ஜெயலலிதாவின் 72ஆவது பிறந்தநாள் விழாவை முன்னிட்டு மாநில அளவில் பெண்களுக்கான கோ-கோ விளையாட்டுப் போட்டிகளை நடத்தியது.

கடந்த பிப்ரவரி 25ஆம் தேதி தொடங்கி நேற்று இதற்கான இறுதிப்போட்டி நடைபெற்றது. இதில் பெரியகுளம் ரோஸி வித்யாலயா அணியை வீழ்த்தி சிவகங்கை அணி வெற்றிபெற்றது. இந்தப் போட்டியில் சிறப்பு விருந்தினராக தேனி மக்களவை உறுப்பினர் ஓ.பி. ரவீந்திரநாத் குமார், வருவாய் மற்றும் பேரிடர் மேலாண்மை, தகவல் தொழில்நுட்பத் துறை அமைச்சர் ஆர்.பி. உதயகுமார் கலந்துகொண்டு போட்டியில் வெற்றிபெற்ற அணியினருக்கு கோப்பைகள் வழங்கினர்.

இவ்விழாவில் பேசிய ஓபிஆர், சிங்கப்பெண்ணே என்ற பாடலில் இடம்பெற்ற வரிகள் எல்லாம் பெண்களுக்கு உற்சாகத்தை தரக்கூடியதாக இருக்கும். அந்தப் பாடலில் உள்ள வரிகளுக்கு ஏற்ப வாழ்ந்துகாட்டி மறைந்தவர்தான் ஜெயலலிதா என்றார்.

பல்வேறு போராட்டங்கள், வலிகளைத் தாங்கி அதனைத் துணிச்சலோடு எதிர்கொண்டதால்தான் இந்திய அளவில் அனைவரின் மனதிலும் மகத்தான தலைவராக வாழ்ந்திருக்கிறார், அவரது வாழ்க்கையை அனைவரும் படிக்க வேண்டும் எனத் தெரிவித்தார்.

இதனையடுத்து பேசிய உதயகுமார், "இன்றைக்கு தேனியின் தமிழ்நாட்டைச் சேர்ந்த ஒரேயொரு நட்சத்திரம்தான் நாடாளுமன்றத்தில் தமிழ்நாடு ஜீவாதார உரிமைகளை சிங்கக்குட்டி போல எழுப்பிவருகிறது.

நாடாளுமன்றத்தில் தனது கன்னிப்பேச்சிலேயே பிரதமர் நரேந்திர மோடியின் கவனத்தை ஈர்த்தவர். மேலும் ஆடம்பரமில்லாமல் அமைதியாக பல சாதனைகளையும், திறமைகளையும் அவர் செய்துவருகிறார்" எனக் கூறினார். இவ்விழாவில் பள்ளி மாணவிகள், அதிமுகவினர் உள்பட பலர் கலந்துகொண்டனர்.

இதையும் படிங்க: 'ஸ்டாலினுக்கு மனோவியாதி' - எம் பி ரவீந்திரநாத் குமார் விமர்சனம்