ஐந்தரை அறிவு கொண்ட எடப்பாடி பழனிசாமி சிறை செல்வது உறுதி... ஓபிஎஸ் ஆதரவாளர் புகழேந்தி

எடப்பாடி பழனிசாமி அதிமுகவில் மன்னனாக மகுடம் சூட முடியாது என்றும், ஐந்தரை அறிவு கொண்ட எடப்பாடி பழனிசாமி மற்றும் முன்னாள் அமைச்சர்கள் விரைவில் சிறை செல்வது உறுதி என ஓ.பன்னீர்செல்வத்தின் ஆதரவாளர் புகழேந்தி தெரிவித்துள்ளார்.

தேனி பெரியகுளத்தில் உள்ள ஓ.பன்னீர்செல்வத்தின் இல்லத்திற்கு ஓ.பன்னீர்செல்வத்தின் ஆதரவாளரான புகழேந்தி நேரில் வந்து ஓ.பன்னீர்செல்வத்தின் மனைவியின் முதலாமாண்டு நினைவு அஞ்சலி அனுசரிப்பை ஒட்டி, அவரது திருவுருவப்படத்திற்கு மலர்த்தூவி மரியாதை செலுத்திய பின் செய்தியாளர்களைச் சந்தித்தார்.

அப்போது, “எடப்பாடி பழனிசாமி ஒருபோதும் அதிமுகவின் மன்னனாக மகுடம் சூட முடியாது. ஐந்தரை அறிவுள்ள எடப்பாடி பழனிசாமி உடன் இருக்கும் முன்னாள் அமைச்சர்கள் அனைவரும் பணத்தைப் பெற்றுக்கொண்டு அவரைத் தவறாக வழிநடத்திச்செல்கிறார்கள். அதிமுக கட்சி, மற்றும் இரட்டை இலைச் சின்னம் முடங்குகிறது என்றால் அதற்குக் காரணம் அரசியல் பச்சோந்தி கே.பி. முனுசாமி தான் காரணம். எடப்பாடி பழனிசாமியை அரசியல் ரீதியாக முடிவு கட்டும் வேலையை செய்துவருகிறார், கே.பி. முனுசாமி.

முன்னாள் முதலமைச்சர் ஜெயலலிதா மறைவுக்குப்பின் வி.கே.சசிகலா தவறுதலாக எடப்பாடி பழனிசாமியை தேர்வு செய்ததுதான் இப்போதைய அரசியல் மாற்றத்திற்குக் காரணம். அவர் இதை பலமுறை என்னிடம் கூறி வருத்தப்பட்டிருக்கிறார். எடப்பாடி பழனிசாமி ஜெயிலுக்கு போவது உறுதி. அவருடன் உள்ள முன்னாள் அமைச்சர்களும் சிறை செல்வார்கள். அதற்குக்காரணம் இந்தியாவில் நடைபெற்ற ஊழலுக்கு எல்லாம் மிகப்பெரிய ஊழல் எடப்பாடி பழனிசாமி தலைமையில் நடைபெற்ற ஆட்சியில் நடைபெற்றுள்ளது.

தேர்தலின்போது அவசர அவசரமாக 10.5 விழுக்காடு இட ஒதுக்கீட்டை தற்காலிகம் என்று கூறி தென்மாவட்டங்களில் பரப்புரை மேற்கொண்டதால் தென் மாவட்டங்களில் அதிமுக பெரும் தோல்வியைச் சந்தித்தது. இதற்குக் காரணம் முன்னாள் அமைச்சர் ஆர்.பி. உதயகுமார் மற்றும் எடப்பாடி பழனிசாமி தான்.

இரட்டை இலையை முடக்கினாலும் கட்சியே போனாலும் பரவாயில்லை சுயாட்சியாக நின்று எடப்பாடி பழனிசாமி வரும் தேர்தலைச் சந்திக்க திட்டம் தீட்டி உள்ளார். ஓ.பன்னீர்செல்வம் அவர்கள் அதிமுகவை மீட்டெடுத்து வழி நடத்துவார். துரோகத்தின் உச்சம் அடைந்த எடப்பாடி பழனிசாமியிடம் இருப்பவர்கள் எடப்பாடி பழனிசாமிக்கு துரோகம் செய்யாமல் இருந்தால் நல்லது” எனப் பேசினார்.

மேலும், தூத்துக்குடி துப்பாக்கிச் சூடு விவகாரம் குறித்து செய்தியாளர்கள் கேட்டபோது, “ துப்பாக்கிச்சூடு நடத்தியவர் எடப்பாடி பழனிசாமி தான். அவர் மற்றும் அப்போதைய டிஜிபி உள்ளிட்ட உயர் அலுவலர்கள் இதில் கைது செய்யப்பட வேண்டும். இதுபோன்று கோடநாடு வழக்கு, ஊழல் வழக்கு அனைத்து விஷயங்களும் கசியத்தான் செய்யும்” என செய்தியாளர் சந்திப்பில் புகழேந்தி தெரிவித்தார்.