யானைகளின் வழித்தடத்தில் அமைத்த முள்வேலியை அகற்ற கோரிக்கை!

நீலகிரி: குன்னூர் மேட்டுப்பாளையம் வனப்பகுதியில் ஈச்சமரம் மலை ரயில் பாதையின் அருகே யானைகளின் வழித்தடத்தில் அமைத்த முள்வேலியை அகற்ற மக்கள் கோரிக்கை விடுத்துள்ளனர்.

குன்னூர்-மேட்டுப்பாளையம் சாலையில் ஈச்சமரம் பகுதியில், தண்ணீர் தேவைக்காக யானைகள் தண்டவாளத்தைக் கடந்து சென்று வருகிறது. அண்மையில் குன்னூர் மேட்டுப்பாளையம் வனப் பகுதி ஈச்சமரம் பகுதியில் 11 யானைகள் முகாமிட்டன.

தற்போது அப்பகுதியில் தண்டவாளத்தின் அருகே தனியாரைச் சேர்ந்த சிலர் வேலிகள் அமைத்து கட்டுமான பணிகளுக்கான ‌பொருட்களை வைத்துள்ளனர். மேலும் அப்பகுதியில் ஓடையை சுற்றிலும் வேலி அமைத்து, அங்குள்ள பாறைகளை பயன்படுத்தி வழித்தடம் அமைத்துள்ளனர்.

தனியாரும், அங்கு கட்டுமான பணிகளில் ஈடுபட்டு வருகின்றனர். மேலும் அப்பகுதியை சேர்ந்த மக்கள் அடர்ந்த வனப்பகுதியில் யானைகள் கடந்து செல்லும் பாதையில் எவ்வாறு வேலிகள் அமைக்க அலுவலர்கள் அனுமதி அளித்தனர் என்று கேள்வியும் எழுப்பியுள்ளனர்.

சுற்றிலும் முள்வேலி அமைக்கப்பட்டுள்ளதால், யானைகள் சென்று வரும் பாதை மறைக்கப்பட்டுள்ளது. இதனால் யானைகள் அருகில் உள்ள குடியிருப்பு பகுதிகளுக்குள் வரக்கூடிய நிலை ஏற்பட்டுள்ளது.

இப்பகுதி பர்லியாறு பஞ்சாயத்திற்குட்பட்ட பகுதி என்பதால், வருவாய் துறையினர் மற்றும் வனத்துறையினர் நேரில் சென்று ஆய்வு மேற்கொள்ள வேண்டும் என்று வன விலங்கு ஆர்வலர்களும் கோரிக்கை விடுத்துள்ளனர்.

இதையும் படிங்க: அம்மா உணவகத்தில் கூடுதலாக உணவு தயாரிக்க மாநகராட்சி அறிவுறுத்தல்!