நீலகிரி: நீலகிரி மாவட்ட ஆட்சியராக கடந்த 2 வருடங்களாக எஸ்.பி அம்ரித் பதவி வகித்து வந்தார். கடந்த 7-ஆம் தேதி தலைமைச் செயலாளர் சிவ்தாஸ் மீனா, பல்வேறு மாவட்ட ஆட்சியர்களை மாற்றி உத்தரவிட்டார். அதன்படி நீலகிரி மாவட்ட ஆட்சியராக இருந்த எஸ்.பி அம்ரித் சென்னை நில நிர்வாக கூடுதல் இணை ஆணையராக மாற்றம் செய்யப்பட்டார்.
மேலும், சென்னை மாவட்ட ஆட்சியராக இருந்த மு.அருணா நீலகிரி மாவட்ட ஆட்சியராக மாற்றம் செய்யப்பட்டார். இந்நிலையில் இன்று (செப்.13) உதகையில் உள்ள மாவட்ட ஆட்சியர் அலுவலகத்தில் 115-ஆவது ஆட்சியராக மு.அருணா இன்று பொறுப்பேற்றுக் கொண்டார்.
அதன் பின் செய்தியாளர்களை சந்தித்த அவர், "நீலகிரி மாவட்டத்தில் மழைக்காலங்களில் ஏற்படும் பேரிடர்களை தடுக்க நவீன முறையில் நடவடிக்கை மேற்கொள்ளப்படும். பழங்குடியின மக்களுக்கு சேர வேண்டிய நலத்திட்ட உதவிகள் மற்றும் சலுகைகள் சரியான முறையில் கொண்டு சேர்க்க நடவடிக்கை எடுப்பேன் என்று கூறினார்.
இதையும் படிங்க: எருமை திருட்டு வழக்கில் 58 ஆண்டுகளுக்கு பிறகு கைதான நபர்.. நடந்தது என்ன?
தொடர்ந்து பேசிய அவர், சுற்றுச்சூழலை பாதுகாக்கும் வகையில் பிளாஸ்டிக் பொருட்கள் தடை செய்யப்பட்டுள்ளது. அதனை சுற்றுலா பயணிகள் மாவட்டத்திற்குள் கொண்டு வராதபடி நடவடிக்கைகள் மேற்கொள்ளப்படும். அதுமட்டுமல்லாமல் மலைகளை குடைந்து கட்டடங்கள் கட்டப்பட்டு வருவது குறித்து ஆய்வுகள் மேற்கொள்ளப்பட்டு உரிய நடவடிக்கைகள் எடுக்கப்படும்" என்றார்.
முன்னதாக புதிதாக பொறுப்பேற்க வந்த மாவட்ட ஆட்சியருக்கு நீலகிரி மாவட்டத்தின் மண்ணின் மைந்தர்கள் என்றழைக்கப்படும் தோடர், கோத்தர் உள்ளிட்ட பழங்குடியின மக்கள் தங்களது பாரம்பரிய உடையணிந்து உற்சாக வரவேற்பு அளித்தனர்.
இதையும் படிங்க: Manimandapam for Elephant Rukku: அண்ணாமலையார் கோயில் யானை ருக்குக்கு மணிமண்டபம் - பூஜை இனிதே நிறைவு!
