தஞ்சாவூர் மாவட்டம், திருவிடைமருதூர் அருகே குறிச்சிமலை புதுத்தெருவில் வசிக்கும் பட்டியலின இளைஞர்கள் அப்பகுதியில் அம்பேத்கர் படிப்பகம் அமைப்பதற்காக கடந்த 7ஆம் தேதி, அதே பகுதியில் கொட்டகை அமைத்து வந்தனர். அப்பகுதியில் ஒரு சில இடங்களுக்கு திருமங்கலக்குடியைச் சேர்ந்த பாபு என்கிற செந்தூர்பாண்டி, நிர்வாகியாக இருந்து வருவதாகக் கூறப்படுகிறது. இதில் பாபு நிர்வகிக்கும் நிலப்பகுதிகளில் குறிச்சிமலை இளைஞர்கள் படிப்பகத்தை அமைத்துள்ளனர்.
இதனையடுத்து பாபுவின் ஆதரவாளர்கள் சிலர் அம்பேத்கர் படிப்பகத்தில் செல்போன் கேமரா மூலம் வீடியோ பதிவு செய்து அவரிடம் கொடுத்துள்ளனர். இதில் ஆத்திரமடைந்த பாபு அம்பேத்கர் படிப்பகம் அமைத்த புது தெருவைச் சேர்ந்த சுரேஷ் (22), பார்த்திபன்(24) ஆகியோரைத் துப்பாக்கி முனையில் மிரட்டி, முட்டிப் போட வைத்துள்ளார். பின்னர் இருவரையும் சரமாரியாகத் தாக்கியதில் இருவரும் கும்பகோணம் அரசு மருத்துவமனையில் சிகிச்சைப் பெற்று வருகின்றனர்.
இந்நிலையில் திருவிடைமருதூர் காவல் நிலையத்துக்கு முன்பு, விடுதலைச் சிறுத்தைகள் கட்சியின் நிர்வாகி வெண்மணி தலைமையில் நூற்றுக்கும் மேற்பட்ட கிராம மக்கள் பாபு என்கிற செந்தூர்பாண்டியைக் கைது செய்ய வேண்டும் என்று வலியுறுத்தி கண்டன முழக்கம் எழுப்பினார்கள்.
பின்னர் கிராம மக்கள் கோரிக்கையை ஏற்ற திருவிடைமருதூர் காவல் துறை ஆய்வாளர் விஜயா, செந்தூர் பாண்டி மீது வன்கொடுமை தடுப்புச் சட்டத்தின்கீழ் வழக்குப் பதிவு செய்து விசாரணை நடத்தி வருகின்றனர்.
இதையும் படிங்க...பேருந்தும் லாரியும் நேருக்கு நேர் மோதிய விபத்து - 3 பேர் உயிரிழப்பு
