தஞ்சாவூர்: பேராவூரணியில் ஆடி, ஆவணி மாதங்களில் ஐந்து ஆண்டுகளுக்கு ஒரு முறை மொய் விருந்து நடத்தப்படுகிறது. தனியாக நடத்தப்பட்ட இந்த மொய் விருந்து தற்போது வீட்டில் விசேஷம் வைத்திருப்பவர்கள் 4 அல்லது 5 பேர் சேர்ந்து மொய் விருந்து நடத்துகின்றனர். அதன்படி பேராவூரணியில் இன்று (ஆக.25) நடத்தப்பட்ட மொய் விருந்தில் 100க்கும் மேற்பட்ட ஆடுகளை வெட்டி விருந்து நடத்தி, அதில் சுமார் ரூ. 11 கோடி மொய் பணம் வசூலாகி உள்ளது.
கமகமக்கும் கறிச்சாப்பாடு, மணமணக்கும் சாம்பார் சாப்பாடு என 15 ஆயிரம் பேருக்கு மேல் விருந்து கொடுக்கப்பட்டுள்ளது. 5 ஆண்டுகளுக்கு ஒரு முறை நடைபெறும் இந்த மொய் விருந்து மூலம் கிடைக்கும் வருவாயில் திருமணம், வீடு கட்டுதல், கல்விச்செலவு, விவசாயம் போன்ற சுப காரியங்களை மக்கள் செய்கின்றனர்.
வங்கி மற்றும் தனியாரிடம் வட்டிக்கு கடன் வாங்காமல், வட்டி இல்லா கடனாக இந்த மொய் விருந்து பணம் பயன்படுகிறது. சாதி, மதம் வேறுபாடு இல்லாமல் இந்த நிகழ்ச்சி நடைபெறுகிறது. அவரவர் வசதிக்கு ஏற்ப, பல ஆயிரம் ரூபாய் வரை மொய் செய்துள்ளனர்.
மொத்தம் 15 இடங்களில் மொய் பணத்தை எண்ணுவதற்கு இயந்திரம் வைக்கப்பட்டது. மொய் வாங்கும் இடத்தில் சிசிடிவி கேமரா பொருத்தப்பட்டு கண்காணிக்கப்பட்டது. துப்பாக்கி ஏந்திய தனியார் பாதுகாவலர்கள் நிறுத்தப்பட்டு இருந்தனர். இந்த மொய் விருந்தில் 11 கோடி ரூபாய் வசூலாகி உள்ளது குறிப்பிடத்தக்கது.
இதையும் படிங்க: மதுரை அருகே ஊரணியில் உயிரிழந்து மிதக்கும் மீன்கள்.. மாசுக்கட்டுப்பாட்டு அலுவலர்கள் ஆய்வு
