கும்பகோணம்: காசிராமன் தெருவில் ஒரே கட்டிட வளாகத்தினுள் ஸ்ரீ கிருஷ்ணா பெண்கள் உயர்நிலைப்பள்ளி, ஸ்ரீ கிருஷ்ணா உதவிபெறும் தொடக்கப்பள்ளி, சரஸ்வதி நர்சரி பள்ளி ஆகிய மூன்று பள்ளிகள் இயங்கி வந்தது. இதில் 750க்கும் மேற்பட்ட மாணவ, மாணவிகள் கல்வி பயின்று வந்தனர். இப்பள்ளியில் கடந்த 2004 ஆம் ஆண்டு ஜீலை 16 ஆம் தேதி ஆடி வெள்ளி அன்று கீழ் தளத்தில் இருந்த சத்துணவு கூடத்தில் தீப்பிடித்தது. இந்த தீ கட்டிடத்தின் மேல் தளத்திலிருந்த கீற்று கொட்டகைக்கு பரவியது.
இந்த கோர தீ விபத்தில் சிக்கி 94 அப்பாவி பச்சிளம் பள்ளி குழந்தைகள் கருகி பரிதாபமாக உயிரிழந்தனர். மேலும் 18 குழந்தைகள் தீக்காயங்களால் படுகாயம் அடைந்து இன்றளவும் மாறா வடுவுடன் வாழ்ந்து வருகின்றனர். இது குறித்து கும்பகோணம் கிழக்கு காவல்துறையினர் வழக்குப் பதிவு செய்தனர்.
இதில் பள்ளி நிறுவனர் புலவர் பழனிசாமி, அவரது மனைவியும் பள்ளி தாளாளருமான சரஸ்வதி, தலைமை ஆசிரியர் சாந்தலட்சுமி, சத்துணவு அமைப்பாளர் விஜயலட்சுமி, சமையல் உதவியாளர் வசந்தி, பள்ளிக்கல்வி இயக்குநர் கண்ணன், மாவட்ட முதன்மை கல்வி அலுவலர் முத்து பழனிசாமி, வட்டாட்சியர் பரமசிவம், கட்டிடப் பொறியாளர் ஜெயச்சந்திரன், நகராட்சி ஆணையர் சத்தியமூர்த்தி, நகரமைப்பு அலுவலர் முருகன், பள்ளி ஆசிரியை தேவி, மகாலட்சுமி, அந்தோணி அம்மாள் மற்றும் கல்வித்துறை அலுவலர்கள் பழனிச்சாமி, நாராயணசாமி, ராதாகிருஷ்ணன், பாலகிருஷ்ணன், மாதவன், பாலாஜி, சிவப்பிரகாசம், தாண்டவன், துரைராஜ், பாலசுப்பிரமணியன், என மொத்தம் 24 பேர் கைது செய்யப்பட்டனர்.
இந்த வழக்கில், முன்னாள் பள்ளி தலைமையாசிரியர் பிரபாகரன் அப்ரூவர் ஆகி கும்பகோணம் நீதிமன்றத்தில் ஆஜராகி ஒப்புதல் வாக்குமூலம் அளித்தார். இதைத் தொடர்ந்து இவ்வழக்கு 2006ம் ஜூலை 12ம் தேதி தஞ்சை அமர்வு நீதிமன்றத்திற்கு மாற்றப்பட்டது.
இதனிடையே இவ்வழக்கிலிருந்து தொடக்கக் கல்வி இயக்குநர் கண்ணன், மாவட்ட முதன்மை கல்வி அலுவலர் முகத்துப்பழனிச்சாமி, தாசில்தார் பரமசிவம் ஆகிய மூவரை தமிழக அரசு விடுதலை செய்து உத்தரவிட்டது.
பிறகு, 2014 ஜூலை 30ம் தேதி நீதிபதி எம் என் முகமதுஅலி தனது தீர்ப்பில் குற்றம்சாட்டப்பட்ட எஞ்சிய 21 பேரில் 10 பேருக்கு தண்டனை வழங்கியும், 11 பேரை விடுவித்தும் தீர்ப்பளித்தார். இதில் பள்ளி நிறுவனர் பழனிச்சாமி மற்றும் அவரது மனைவியும், பள்ளி தாளாருமான சரஸ்வதியும் ஏற்கனவே உயிரிழந்து விட்டனர். தற்போது இத்தீர்ப்பு குறித்து தமிழக அரசு தரப்பிலும், பெற்றோர் தரப்பிலும் உயர்நீதிமன்ற மதுரை கிளையில் மேல்முறையீடு செய்யப்பட்டு நிலுவையில் உள்ளது.
இந்நிலையில், இன்று ஜூலை 16 உலகையே உலுக்கிய இத்துயர சம்பவத்தின் 18ம் ஆண்டு நினைவு நாள் கடைபிடிக்கப்படும் நிலையில், பள்ளியில் அமைக்கப்பட்டுள்ள 94 குழந்தைகளின் புகைப்பட பிளக்ஸ் பேனர் முன்பு, குழந்தைகளை பறிகொடுத்த பெற்றோர் சிலர், ஒன்று கூடி, தீபங்கள் ஏற்றி, வாழை இலையில், பழங்கள், இனிப்பு வகைகள், பிஸ்கெட், சாக்லேட் வகைகள், சர்க்கரைப் பொங்கல், ஆகியவற்றை வைத்து படையலிட்டு வழிபட்டனர்.
தொடர்ந்து காலை, 9 மணியளவில் சம்பவம் நடத்த பள்ளி முன்பு குழந்தைகளை பறிகொடுத்த பெற்றோர், அரசுத்துறை அலுவலர்கள், அரசியல் கட்சியினர், தன்னார்வ தொண்டு நிறுவனத்தினர், சமூக ஆர்வலர்கள், பொது மக்கள், பள்ளி கல்லூரி மாணவ மாணவிகள் என பலரும் மெழுகுவர்த்தி ஏற்றியும், மலர் மாலைகள், மலர் வளையங்கள் வைத்தும், உதிரி மலர்களைத் தூவியும் மரியாதை செலுத்துகின்றனர்.
காலை 10 மணி அளவில், அங்கிருந்து ஊர்வலமாகப் புறப்பட்டு பாலக்கரை பகுதியில் அரசு அமைந்துள்ள நினைவிடத்தில் பாதிக்கப்பட்ட பெற்றோர் மலர் வளையம் வைத்து அஞ்சலி செலுத்தினர். பின்னர் மாலை சம்பவம் நடந்த பள்ளியிலிருந்து அமைதி ஊர்வலமாகப் புறப்பட்டு முக்கிய வீதிகள் வழியாக மகாமக குளம் சென்று அங்கு 94 மோட்ச தீபங்களை ஏற்ற திட்டமிட்டுள்ளனர்.
இதையும் படிங்க: பள்ளி குழந்தைகளுடன் சாக்ஷி அகர்வால் - புகைப்படத்தொகுப்பு!
