குத்துச்சண்டையில் பதக்கங்களை குவிக்கும் அரசுப் பள்ளி மாணவர்!

தஞ்சை: பட்டுக்கோட்டை அருகே அரசு ஆண்கள் மேல்நிலைப்பள்ளி மாணவர் ஒருவர் குத்துச்சண்டையில் பதக்கங்களை குவித்து வருகிறார்.

தஞ்சை மாவட்டம் பட்டுக்கோட்டை நகராட்சிக்குட்பட்ட சாமியார் மடம் டி.வி.எஸ் காலனியில் வசித்து வருபவரும் சுரேஷ் மகன் ஹரிஹரன்(14). இவர் பட்டுக்கோட்டை அரசு ஆண்கள் மேல்நிலைப்பள்ளியில் எட்டாம் வகுப்பு படித்து வருகிறார். குத்துச்சண்டையில் ஹரிஹரனுக்கு அதிக ஆர்வம் இருப்பதையறிந்த பள்ளி தலைமையாசிரியர் அவருக்கு உடற்கல்வி இயக்குநர், உடற்கல்வி ஆசிரியர்களை வைத்து குத்துச்சண்டை பயிற்சியளிக்க உதவி வந்தார்.

கடந்த நவம்பர் மாதம் 3ஆம் தேதி அவர், திருச்சியில் நடைபெற்ற "ஸ்கூல் கேம் அண்ட் பெடரேஷன் ஆப் இந்தியா" எனும் பள்ளிகளுக்கிடையேயான குத்துச்சண்டைப் போட்டியில் கலந்து கொண்டு இரண்டாம் இடத்தைப் பெற்றார். அதேபோல் தஞ்சை மாவட்டத்தில் உள்ள குறுவட்ட அளவிலான 7 போட்டிகளில் வென்று, மாநில அளவிலான குத்துச்சண்டை போட்டிக்குத் தேர்வானார்.

பின்னர், தர்மபுரியில் நடைபெற்ற மாநில அளவிலானப் போட்டியில் கலந்துகொண்டு ஆனந்தா என்பவரைத் தோற்கடித்து தங்கப்பதக்கம் வென்றார். மேலும் தேசிய அளவில் சாதனைப் படைக்க போவதாகவும் உறுதியுடன் அவர் கூறுகிறார்.

பல்வேறு பதக்கங்களை வென்ற இவருக்கு மாவட்ட ஆட்சியர், மாவட்ட முதன்மை கல்வி அலுவலர்கள் பாராட்டி கௌரவித்திருப்பது குறிப்பிடத்தக்கது.

இதையும் படிங்க: தேசிய கபடி போட்டியில் தங்கம் வென்ற திருவள்ளூர் மாணவர்கள்!