"தீண்டாமை குறித்து இந்து தர்மம் கூறவில்லை.. தமிழகத்தில் தான் அதிகளவு தீண்டாமை நடக்கிறது" - ஆளுநர் ஆர்.என்.ரவி!

தீண்டாமை குறித்து இந்து தர்மம் கூறவில்லை என்றும் தமிழகத்தில் தான் அதிகளவு தீண்டாமை நடக்கிறது என்றும் தமிழ்நாடு ஆளுநர் ஆர்.என்.ரவி தெரிவித்து உள்ளார்.

தஞ்சாவூர்: தீண்டாமையின் வேறுபாடு குறித்து இந்து தர்மம் கூறவில்லை என்றும் தமிழகத்தில் தான் அதிகளவு தீண்டாமை நடப்பதாகவும் குடிநீரில் மலத்தை கலப்பது போன்ற செயல்களும் ஜாதி அடையாளங்களை அணிந்து கொள்பவர்களும் இங்கு தான் அதிகம் உள்ளனர் என்றும் ஆளுநர் ஆர்.என்.ரவி தெரிவித்து உள்ளார்.

தஞ்சாவூர் மாவட்டம், கும்பகோணம் அருகே ஒழுகச்சேரி கிராமத்தில் தமிழ் சேவா சங்கம் சார்பில் நடைபெற்ற சிவகுலத்தார் கலை பண்பாட்டு நிகழ்ச்சியில் சிறப்பு விருந்தினராக ஆளுநர் ஆர்.என். ரவி கலந்து கொண்டார். தொடர்ந்து அவர் விழாவில் பேசுகையில், "ஆயிரக்கணக்கான ஆண்டுகளாக கோயில்கள் நம் கலாசாரத்தின் அடையாளமாக இருந்து வருகிறது.

கோயில் என்பது வெறும் வழிபாட்டு தலமாக மட்டுமல்லாமல், அது நம் கலாசாரம், வாழ்க்கையுடன் பிரிக்க முடியாதபடி பின்னிப் பிணைந்தது. இந்த பாரத நாடு மன்னர்களால் உருவாக்கப்படவில்லை. ரிஷிகளாலும், முனிவர்களாலும் உருவாக்கப்பட்ட பெருமைமிகு நாடு. இது தர்மத்தின் அடிப்படையில் அறம் சார்ந்து உருவாக்கப்பட்டுள்ளது. கன்னியாகுமரியில் இருந்து இமயமலை வரை பாரதம் ஒன்றுபட்ட குடும்பமாகவே திகழ்கிறது.

பாரதத்தின் வலிமை பாரத தர்மத்தில் இருந்து உருவானது. இந்து தர்மத்தின் அடிப்படையில் உருவாக்கப்பட்ட இந்த நாட்டில் யாரும் புறக்கணிக்கப்பட்டவர்கள் என்பது கிடையாது. வெவ்வேறு மதம், இனம் பழக்க வழக்கங்கள் கொண்டு இருந்தாலும் அனைவரும் தர்மத்தின் அடிப்படையில் ஒன்றுபட்டவர்கள். இதன் அடிப்படையில் பாரதம் கட்டமைக்கப்பட்டு உள்ளது.

கில்ஜி, துக்ளக், கால்டுவெல், ஜி.யு. போப் உள்ளிட்டோர் வந்து நம்முடைய தர்மத்தை சீரழிக்க நினைத்தாலும், யாராலும் வெற்றி பெற முடியவில்லை. பாரதிய தர்மம் நம்முடைய இதயத்தில் ஒன்றி இருப்பதே அதற்கு காரணம். ஆனால் பிரிட்டிஷ்காரர்கள் நம்முடைய ஆன்மீகம், மொழி, பண்பாட்டில் பாதிப்பை ஏற்படுத்திச் சென்றனர்.

அதனால் தான் அரசியலில் விடுதலை பெற்று இருந்தாலும், நம் கலாசாரம், பண்பாட்டை எப்போது மீட்டுருவாக்கம் செய்கிறோமோ, அன்று தான் உண்மையான விடுதலை என மகாத்மா காந்தி கூறினார். சுதந்திரத்துக்கு பிறகு சாலை, மருத்துவம் உள்ளிட்ட கட்டமைப்பு வசதிகளில் முனைப்பு காட்டினோம்.

ஆனால் கலாசார மறுமலர்ச்சிக்கு எந்தவித முன்னெடுப்பும் செய்யப்படவில்லை. இப்போது பிரதமர் மோடி தலைமையிலான அரசால் நம் நாடு வேகமாக வளர்ச்சி அடைந்து வருகிறது. இதன் மூலம் ஐந்தாவது மிகப்பெரிய பொருளாதார நாடாக நம் நாடு வளர்ச்சி அடைந்துள்ளது. மிக விரைவில் மூன்றாவது இடத்துக்கு முன்னேறி விடுவோம்.

தீண்டாமையின் வேறுபாடு குறித்து இந்து தர்மம் கூறவில்லை. தீண்டாமை அதிகளவு தமிழகத்தில் தான் நடக்கிறது. குடிநீரில் மலத்தை கலப்பது போன்ற செயல்களும், ஜாதி அடையாளங்களை அணிந்து கொள்பவர்களும் இங்கு தான் அதிகம் உள்ளனர். தாழ்த்தப்பட்டவர்கள் சமைத்த உணவை சாப்பிட மாட்டேன் என்பதையும் இங்கு தான் கேட்கிறேன்.

தாழ்த்தப்பட்டவர்கள் கோயிலுக்குள் அனுமதிக்க மாட்டோம் என்பதையும் இங்கு தான் பார்க்கிறேன். நமக்குத் தேவை சமூக மாற்றங்களும் பொது சிந்தனையும் வர வேண்டும் வளர வேண்டும். நாம் அனைவரும் ஒற்றுமையாக வாழ வேண்டும். அனைவருக்கும் விநாயகர் சதுர்த்தி நல்வாழ்த்துக்கள்" என்று ஆளுநர் ஆர்.என். ரவி தெரிவித்தார்.

இதையும் படிங்க: Parliament Special Session : நாடாளுமன்ற சிறப்பு கூட்டத் தொடர் இன்று தொடக்கம்..! முக்கிய மசோதாக்கள் நிறைவேறுமா?