தஞ்சாவூர் மாவட்டம் பட்டுக்கோட்டை அருகே உள்ள கடைமடை பகுதிக்கு ஒவ்வொரு வருடமும் காவிரி நீர் தாமதமாக வருவதால் சம்பா சாகுபடி தாமதமாகதான் தொடங்கப்படும். அதே போல், இந்த வருடம் காவிரி நீர் தாமதமாக வந்தாலும் நீர்நிலைகள் நிரம்பும் அளவிற்கு தண்ணீர் வந்து சேர்ந்தது. இதனால், கடந்த ஒரு மாத காலமாக சம்பா சாகுபடி பணிகள் தொடங்கப்பட்டு தற்போது கதிர் வரும் தருவாயில் பட்டுக்கோட்டை, அதிராம்பட்டினம், மதுக்கூர் ,பேராவூரணி ஆகிய பகுதிகள், இதைச் சுற்றியுள்ள ஏராளமான பகுதிகளில் நெற்பயிர்கள் பயிரிடப்பட்டுள்ளன.
இந்நிலையில், கடந்த மூன்று நாள்களுக்கு முன்பு பட்டுக்கோட்டை அதைச் சுற்றியுள்ள பகுதிகளில் தொடர்ந்து கனமழை பெய்ததால் வயல்வெளிகளில் தண்ணீர் தேங்கி பயிர்கள் தண்ணீரில் மூழ்கின. மேலும், தற்போது இந்த நெற்பயிர்களை ஆனை கொம்பன் நோய் தாக்கியுள்ளதால் இப்பகுதி விவசாயிகள் கவலை அடைந்துள்ளனர்.
இப்பகுதியில் உள்ள சிறு குறு விவசாயிகள் இம்முறை காவிரி நீர் வருகை, பருவமழை பெய்ததால் கடன் வாங்கி ஒரு ஏக்கருக்கு ரூ. 20,000 வரை செலவு செய்து விவசாயிகள் சம்பா சாகுபடி செய்தனர். சாகுபடி செய்யப்பட்ட சம்பா பயிர்களில் தற்போது கதிர் வரும் தருவாயில் ஆனை கொம்பன் நோய் தாக்கியிருப்பது சிறு-குறு விவசாயிகளை மட்டுமல்லாமல் பெரிய விவசாயிகளையும் பாதிப்பை ஏற்பத்தியுள்ளது.
ஆனை கொம்பன் நோய் பயிர்களைத் தாக்கினால் கதிர்கள் உருவாகாது. எனவே ஆனை கொம்பன் நோய் தாக்காத வயல்வெளிகளில் நோயை தடுக்க நடவடிக்கை எடுக்க வேண்டும். மேலும் ஆனை கொம்பன் நோய் பாதிக்கப்பட்ட விளைநிலங்களுக்கு ஏக்கர் ஒன்றுக்கு ரூ.20 ஆயிரம் நிவாரணம் வழங்க வேண்டும் என விவசாயிகள் கோரிக்கை வைத்துள்ளனர்.
பட்டுக்கோட்டை, பள்ளிகொண்டான், சேண்டாகோட்டை, அதிராம்பட்டினம் நிலத்தொட்டி வயல் உள்ளிட்ட பகுதிகளில் மட்டும் கிட்டத்தட்ட 2 ஆயிரம் ஏக்கர் நெற்பயிர்கள் ஆனை கொம்பன் நோயால் பாதிக்கப்பட்டு உள்ளது குறிப்பிடத்தக்கது.
இதையும் படிங்க:
கனமழை காரணமாக பல ஆயிரம் ஏக்கர் நெற்பயிர்கள் நாசம்... விவசாயிகள் வேதனை
