தஞ்சாவூர் மாவட்டம் சுவாமிமலை, காமராஜர் நகர் பகுதியில் வசிப்பவர் முத்தையா மகன் அருணாச்சலம்(30). இவரது மனைவி மீனாட்சி அருணாச்சலம் அமெரிக்காவில் பொறியாளராக பணியாற்றி வருகிறார். தன் குடும்பத்துடன் அமெரிக்காவில் வசித்து வரும் அருணாச்சலம், சுவாமிமலையில் உள்ள தனது வீட்டை தனது மைத்துனரான மேல வீதியில் வசிக்கும் சிவகுமார் (28) என்பவரிடம் ஒப்படைத்து விட்டுச் சென்றுள்ளார்.
இந்த வீட்டை சிவகுமார் தினசரி காலை, மாலை வந்து பராமரித்து வந்துள்ளார். இந்நிலையில் அமெரிக்க பொறியாளர் அருணாச்சலம் வீட்டை நோட்டமிட்டு வந்த அடையாளம் தெரியாத நபர்கள் முன்புற கதவை உடைத்து உள்ளே சென்றுள்ளனர். அங்கிருந்த பீரோ உள்ளிட்டவற்றை உடைத்து பூஜைக்கு வைத்திருந்த வெள்ளி பொருட்கள், டிவி, கேஸ் அடுப்பு உள்ளிட்ட ரூ.2 லட்சம் மதிப்பிலான பொருட்களை கொள்ளையடித்துச் சென்றுவிட்டனர்.
இதையடுத்து வழக்கம்போல் வீட்டை பார்க்க வந்த சிவகுமார், வீட்டின் கதவு உடைக்கப்பட்டு இருப்பதை கண்டு அதிர்ச்சி அடைந்து உடனடியாக சுவாமிமலை காவல் நிலையத்தில் புகார் அளித்துள்ளார். புகாரின் பேரில் சுவாமிமலை காவல் ஆய்வாளர் நாகலட்சுமி, உதவி ஆய்வாளர் மோகன் உள்ளிட்டோர் அங்கு வந்து பார்வையிட்டனர். பின்னர், வழக்குப்பதிவு செய்து கொள்ளையடித்து சென்ற அடையாளம் தெரியாத நபர்களை வலைவீசி தேடி வருகின்றனர்.
