தென்காசி: சங்கரன்கோவில் அருகே உள்ள தலைவன் கோட்டைப் பகுதியைச் சேர்ந்த கிருஷ்ணசாமி மற்றும் அன்னத்தாய் தம்பதியினருக்கு மணிபாலன்(வயது 25) என்ற மகனும், சுந்தரி (வயது 23)என்ற மகளும் உள்ளனர். கிருஷ்ணசாமி என்பவர் அதே பகுதியில் தச்சுப்பணி செய்து வருகிறார். அவரது மனைவி விவசாய கூலி வேலை செய்து வருகிறார்.
இவரது, மகன் மணிபாலன் பத்தாம் வகுப்பு படித்து முடித்து உள்ளார். மகள் கல்லூரி படிப்பை முடித்துள்ளார். இந்நிலையில், வெளிநாடு செல்வதற்கான வாய்ப்பு மணிபாலனுக்கு நண்பர்கள் மூலம் தகவல் கிடைத்ததாக கூறப்படுகிறது. இதையடுத்து மணிபாலன் கேரளா மாநிலம், கொச்சியில் உள்ள தனியார் நிறுவனமான கானா டிராவல்ஸ் நிறுவனத்தை அணுகி உள்ளார்.
அப்போது அந்நிறுவனமானது வெளிநாட்டில் ஜெனரேட்டர் ஆப்ரேட்டராக பணிபுரிய ஆட்கள் தேவைப்படுகிறது எனவும், பதிவு செய்வதற்கு முன்பணம் ரூ.80ஆயிரம் கொடுக்க வேண்டும் எனவும் கூறியதாக சொல்லப்படுகிறது. இதனைத் தொடர்ந்து மணிபாலன் கேரளா மாநிலத்தில் உள்ள தனியார் நிறுவனத்தின் வங்கிக் கணக்கிற்கு 80 ஆயிரம் ரூபாய் பணத்தை செலுத்தியதாக சொல்லப்படுகிறது.
பின்னர், அந்நிறுவனம் டூரிஸ்ட் விசா மூலம் மூன்று மாத கால அவகாசத்தின்படி, கடந்த ஜூலை 25 ஆம் தேதி சவுதி அரேபியாவுக்கு ஜெனரேட்டர் ஆப்ரேட்டர் பணிக்கு மணிபாலனை அனுப்பி வைத்ததாக கூறப்படுகிறது. மணிபாலன் தொடர்ந்து நான்கு மாதங்களாக சவுதி அரேபியாவில் ஜெனரேட்டர் ஆப்ரேட்டர் பணியில் வேலை செய்து வந்ததாக கூறப்படுகிறது.
இந்நிலையில் நான்கு மாதங்கள் ஆகியும், மணிபாலனுக்கு உரிய சம்பளத் தொகை வழங்கப்படவில்லை எனவும், தனது சொந்த நாட்டிற்கு திரும்பி செல்ல முடியாமல் தவிக்கும் அவல நிலையும் ஏற்பட்டுள்ளதாகவும் கூறப்படுகிறது. இதுகுறித்து மணிபாலன் தான் வேலை பார்க்கும் தனியார் நிறுவனத்திடம் எதற்காக எனக்கு நான்கு மாதமாக சம்பளம் வழங்கவில்லை என கேள்வி எழுப்பிய பொழுது, உனக்கெல்லாம் சம்பளம் கொடுக்க முடியாது. நீயும் உன் நாட்டிற்கு செல்ல முடியாது என்றும், அதை மீறி போக நினைத்தால் உன்னை அழித்து விடுவோம் என்று மிரட்டியதாக தெரிகிறது.
இதனிடையே, மணிபாலன் தனக்கு உணவும், நீரும் இல்லாமல் மூன்று நாட்களாக தவித்து வருவதாகவும், தன் குடும்பத்தினைத் தொடர்பு கொண்டு என்னை எப்படியாவது இங்கிருந்து அழைத்து செல்லுங்கள் என்றும் வீடியோ ஒன்றை வாட்ஸ் அப் மூலம் வீடியோ வெளியிட்டு உள்ளார். அந்த காணொளியைக் கண்ட குடும்பத்தினர் அதிர்ச்சி அடைந்துள்ளனர்.
இந்த வீடியோ காட்சிகளின் அடிப்படையில், மணிபாலனைத் தொலைபேசியில் தொடர்பு கொண்டு கேட்ட பொழுது கண்ணீர் மல்க குடும்பத்தாரிடம் தனது கஷ்டங்களை தெரிவித்து உள்ளார். உடனே, அவரது உறவினர்கள் மற்றும் குடும்பத்தார் தென்காசி மாவட்ட ஆட்சியரிடம் வீடியோ காட்சிகளைக் கொண்டு எனது மகன் சவுதியில் இருந்து வீடு திரும்ப முடியாமல் கஷ்டப்பட்டு வருகிறார் என்பது குறித்து மனுவாக மாவட்ட ஆட்சியரிடம் கொடுத்துள்ளனர்.
அதன் அடிப்படையில், மாவட்ட ஆட்சியர் மேல் அதிகாரிகளிடம் தெரிவித்து நடவடிக்கை எடுக்கப்பட்டு வரும் நிலையில், நேற்று அவரது குடும்பத்தாருக்கு மணிபாலனின் whatsapp எண்ணில் இருந்து ஒரு ஆடியோ வந்துள்ளது. அதில், கழிப்பறையில் உள்ள தண்ணீரை குடிப்பதற்கு கொடுப்பதாகவும், மூன்று நாட்களாக உணவு சாப்பிடாமல் இருக்கிறேன் எனவும், மன வேதனையில் நான் என்னை அறியாமல் செத்துவிடுவேன் என்றும் அந்த ஆடியோ பதிவில் கூறியுள்ளார்.
இதனைக்கண்ட குடும்பத்தினர் மணிபாலனைத் தொடர்பு கொள்ள முயன்ற போது அவரது தொலைபேசி சேவை நிறுத்தப்பட்டு இருந்து உள்ளது என்று கூறப்படுகிறது. உடனடியாக மணிபாலனை சவுதியில் இருந்து மீட்டுத் தர வேண்டும் என பெற்றோர், உறவினர்கள் தமிழக அரசுக்கு கோரிக்கை வைத்துள்ளனர்.
இதையும் படிங்க: மிக்ஜாம் புயல் எதிரொலி: திருவள்ளுவர் பல்கலைக்கழகத் தேர்வுகள் ஒத்திவைப்பு..!
