தென்காசி மாவட்டம் கடையம் பகுதியை சேர்ந்தவர் வைகுண்டமணி. மசாலா வியாபாரம் செய்து வரும் இவர், கடந்த 6ஆம் தேதி அதிகாலை வழக்கம்போல் கடையம் அருகே சிவசைலத்தில் இருந்து பெத்தான்பிள்ளை குடியிருப்பு என்ற கிராமத்திற்கு தனது இரு சக்கர வாகனத்தில் வியாபாரத்திற்கு சென்றார்.
அப்போது சாலையின் குறுக்கே திடீரென வந்த கரடி, அவரது இருசக்கர வாகனத்தை மறித்து கீழே தள்ளி கடித்து குதறிக் கொண்டிருந்தது வைகுண்டமணியின் அலறல் சத்தம் கேட்கவே, தகவல் அறிந்து அப்பகுதியை சேர்ந்த நாகேந்திரன் மற்றும் சைலப்பன் ஆகியோர் அவரை காப்பாற்ற முயன்றபோது இருவரையும் கரடி மிக கொடூரமாக கடித்து குதறியது.
இதில் சைலப்பன் நாகேந்திரன் இருவருக்கும் முகத்தில் பலத்த காயம் ஏற்பட்டது. குறிப்பாக இருவரின் முகத்திலும் மூக்கு, வாய் போன்ற உறுப்புகளை கரடி கடித்து சிதைத்திருந்தது. இதையடுத்து தப்பி ஓடிய கரடியைக் பிடிப்பதற்காக வனத்துறையினர் அங்கு முகாமிட்டனர். ஒரு வழியாக அந்த கரடி மயக்க ஊசி செலுத்தப்பட்டு பிடிக்கப்பட்ட நிலையில் களக்காடு அருகே செங்கல்தேரி என்ற ஆள்நடமாட்டம் இல்லாத வனப்பகுதியில் விடப்பட்டது.
விசாரணையில், அது சுமார் 10 வயது மதிக்கத்தக்க பெண் கரடி என தெரியவந்தது. இதற்கிடையில் குறிப்பிட்ட அந்த கரடி தான் அடிக்கடி கீழே இறங்கி தங்களை தொந்தரவு செய்கிறது. எனவே கரடியை தங்கள் கண் முன்னே கொல்ல வேண்டும் என ஊர் பொதுமக்கள் வலியுறுத்தினர். இது போன்ற சூழ்நிலையில் வனத்துறையால் பிடித்து விடப்பட்ட கரடி நேற்று(நவ.07) மர்மமான முறையில் உயிரிழந்த சம்பவம் பெரும் சர்ச்சை ஏற்படுத்தியது.
வனத்துறையினர் தெரிவிக்கையில் கரடி நுரையீரல் பாதிப்பு ஏற்பட்டு உயிரிழந்ததாக கூறினர். அதேசமயம் அளவுக்கு அதிகமாக மயக்க ஊசி செலுத்தியதாலும், கரடி இறந்திருக்கலாம் என்றும் கூறப்படுகிறது. இந்த நிலையில் உயிரிழந்த கரடிக்கு இன்று வன கால்நடை மருத்துவர்கள் உடற்கூறாய்வு செய்தனர்.
அதன் பின்னர் வனத்துறை அதிகாரிகள் முன்னிலையில் செங்கல்தேரி வனப்பகுதியில் வைத்து கரடியை தீவைத்து எரியுட்டினர். வழக்கமாக இது போன்று விலங்கினம் இறந்தால் குழி தோண்டி புதைப்பார்கள். ஆனால் கரடியை தீவைத்து எரித்திருப்பதும் ஒரு வித சர்ச்சையை எழுப்பியுள்ளது குறிப்பிடத்தக்கது.
இதையும் படிங்க: கரடி தாக்குதல்; முகம் சிதைந்த இருவருக்கு பிளாஸ்டிக் சர்ஜரி
