சிவகங்கை நாடாளுமன்ற தொகுதி நாடே உற்று பார்க்கும் மிக முக்கியமான வி.ஐ.பி தொகுதியாகும். இந்த தொகுதியில் அதிமுக, பாஜக கூட்டணி சார்பில் பாஜக தேசிய செயலாளர் எச்.ராஜா அறிவிக்கப்பட்டுள்ளார். திமுக காங்கிரஸ் கூட்டணி சார்பில் காங்கிரஸ் கட்சிக்கு என அறிவிக்கப்பட்டுள்ள சூழலில் சற்றுமுன்தான் கார்த்தி சிதம்பரம் அறிவிக்கப்பட்டுள்ளார். இந்நிலையில் அதிமுகவில் இருந்து பிரிந்த டிடிவி தினகரனின் அமமுக சார்பில் போட்டியிடும் வேட்பாளராக அறிவிக்கப்பட்ட தேர்போகி பாண்டி தேர்தல் பிரச்சாரத்தை முன்னதாகவே துவங்கி தொகுதியின் ஒவ்வொரு பகுதியாக சுற்றுப்பயணம் மேற்கொண்டு வருகின்றார். இன்று சிவகங்கையில் உள்ள தனியார் மஹாலில் அமமுக சார்பில் வேட்பாளர் அறிமுக கூட்டம் மற்றும் செயல்வீரர்கள் கூட்டம் நடைபெற்றது.
இதில் வேட்பாளரை அறிமுகம் செய்து வைத்து பேசிய மாவட்ட செயலாளர் உமாதேவன், அம்மா சிறையில் இருக்கும்போது அவர்களுக்கு வழங்கிய தண்ணீரில் சோப்பு பவுடரை தெளித்ததாகவும் அதேபோல் அவருக்கு வழங்கிய உணவில் கரப்பான்பூச்சி வைத்து வழங்கியதாகவும் கூறினார். அத்தனை துரோகத்திற்கும் காரணம் கார்த்தி சிதம்பரம் என்றும் அதனால்தான் அம்மாவின் ஆவி அவர்களை துரத்துவதாகவும் தெரிவித்தார்.
அதன்பின் வேட்பாளர் தேர்போகி பாண்டி பேசும்போது, தான் ஒரு சாதாரண விவசாய குடும்பத்தை சேர்ந்தவன் என்றும் மிட்டாமிராசு குடும்பத்தை சேர்ந்தவன் இல்லை என்றும் தான் அமெரிக்காவிலோ அல்லது ஆப்பிரிக்கவிற்கோ சென்று படிக்கவில்லை என்றும் சாதாரண பள்ளியில் படித்தவன் என்றார்.
