மின்வாரிய அலுவலகத்தை முற்றுகையிட்ட கிராம மக்கள்!

சிவகங்கை: மின்சார துண்டிப்பை சரிசெய்யாமல் மின்ஊழியர்கள் அலட்சியம் காட்டியதால் ஆத்திரமடைந்த ஏழு கிராமங்களைச் சேர்ந்த மக்கள் மின்வாரிய அலுவலகத்தை முற்றுகையிட்டு தர்ணாவில் ஈடுபட்டனர்.

சிவகங்கை அருகே சூரக்குளம் பஞ்சாயத்திற்குட்பட்ட பொன்னாம்பட்டி, முடிக்கரை, ஆனமாவளி உள்ளிட்ட ஏழு கிராமங்களில் மே 24ஆம் தேதி முதல் மின்சாரம் தடைபட்டுள்ளது. இதனால் கோடை வெயிலில் இயல்பு வாழ்க்கை பாதித்ததோடு விவசாய பணிகள் முற்றிலும் பாதிப்படைந்துள்ளன.

இது தொடர்பாக பல முறை புகார் தெரிவித்தும் மின் வாரியம் உரிய நடவடிக்கை எடுக்காததால் நாட்டரசன்கோட்டை மின் வாரிய அலுவலகத்தை கிராம மக்கள், விவசாயிகள் நெல் நாற்றுகளுடன் முற்றுகையிட்டு அலுவலகம் முன்பு தர்ணாவில் ஈடுபட்டனர். மேலும் உடனடியாக நடவடிக்கை எடுக்காவிட்டால் சாலை மறியல் போராட்டத்தில் ஈடுபட உள்ளதாக விவசாயிகள் தெரிவித்தனர்.