ஈரோடு மாவட்டம், பவானி வட்டம் தர்மாபுரி கிராமத்தைச் சேர்ந்தவர் பழனிசாமி மகன் செல்வன் (26). குருப்பநாயக்கன் பாளையத்தைச் சேர்ந்தவர் ஜெகநாதன் மகன் இளமதி (23). இவர்கள் இருவரும் ஈரோடு பகுதியில் உள்ள ஒரு தனியார் நிறுவனத்தில் பணிபுரிந்து வருகின்றனர்.
இவர்கள் இருவருக்கும் நட்பு ஏற்பட்டு, அது நாளடைவில் காதலாக மாறியுள்ளது. இதனையடுத்து இருவரும் திருமணம் செய்துகொள்ள முடிவு செய்துள்ளனர். செல்வன், கொளத்தூர் மணி தலைமையிலான திராவிடர் விடுதலைக் கழகத்தில் உறுப்பினராக இருப்பதால், அந்த அமைப்பின் தலைமைக் குழு உறுப்பினரான ஈஸ்வரன் என்பவரை அணுகி திருமணம் நடத்தி வைக்குமாறு உதவி கேட்டுள்ளார்.
இதையடுத்து கொளத்தூர் அருகே உள்ள காவலாண்டியூர் பகுதியில் உள்ள பெரியார் படிப்பகத்தில் நேற்று காலை 11 மணிக்கு இருவரும் சுயமரியாதை திருமணம் செய்துகொண்டனர். பின்னர், அதேப்பகுதியில் உள்ள ஈஸ்வரன் வீட்டில் செல்வனும், இளமதியும் மாலை 5 மணி வரை இருந்துள்ளனர்.
பிறகு செல்வனின் நண்பரான சரவணபரத் என்பவரை சந்திப்பதற்காக, அங்கிருந்து இளமதியும், செல்வனும் சென்றுள்ளனர். இரவில் கார் மற்றும் இருசக்கர வாகனங்களில் வந்த சுமார் 50 பேர் ஈஸ்வரனை தாக்கி அவரை வலுக்கட்டாயமாக காரில் ஏற்றி சென்றுள்ளனர்.
அதே போன்று இளமதியும், செல்வனும், அவருடைய நண்பரான சரவணபரத்துடன் இருசக்கர வாகனத்தில் உக்கம்பருத்திக்காடு என்ற பகுதியில் சென்று கொண்டிருந்தபோது, அவ்வழியே அந்த சிலர் அவர்களை வழிமறித்து கடுமையாகத் தாக்கியுள்ளனர்.
இதையடுத்து தம்பதியரான இளமதியை ஒரு காரிலும், செல்வனை ஒரு காரிலும் ஏற்றிய நபர்கள், சரவணபரத்தை தாக்கிவிட்டு இரு சக்கர வாகனத்தையும் எடுத்துக்கொண்டு அங்கிருந்து தப்பியோடினர். ஈஸ்வரன் கடத்தப்பட்டது குறித்து, காவலாண்டியூர் பகுதியைச் சேர்ந்தவர்கள் கொளத்தூர் காவல் நிலையத்தில் புகார் அளித்தனர். இதன்பேரில் காவலாண்டியூர் ஈஸ்வரன் வீட்டருகே இருந்த சிசிடிவி காட்சிகளை கைப்பற்றி காவல் துறையினர் விசாரணை நடத்தினர்.
அப்போது சிசிடிவியில் பதிவான கார்களில் பாமக, கொங்குநாடு மக்கள் தேசிய கட்சியின் கொடிகள் கட்டப்பட்டிருந்ததை அறிந்த காவல்துறையினர், கொளத்தூர் செக்ஸ்போர்ட் உள்ளிட்ட பகுதிகளில் வாகன தனிக்கையில் ஈடுபட்டனர். நள்ளிரவில் கொங்குநாடு மக்கள் தேசியக் கட்சி கொடியுடன் வந்த ஆம்னி காரை நிறுத்தி விசாரித்தனர்.
காரில் இருந்த நபர்கள் முன்னுக்குப்பின் முரணாக பதிலளித்தை அடுத்து, அனைவரையும் பிடித்து காவல்நிலையம் அழைத்து சென்றனர். அவர்களிடம் நடத்திய விசாரணையில், இளமதியின் தந்தை, கொங்குநாடு மக்கள் கட்சியின் பவானி ஒன்றிய செயலாளர் என்பதும், இளமதியும், செல்வனும் வெவ்வேறு ஜாதியைச் சார்ந்தவர்கள் என்பதால், கலப்புத் திருமணத்தை ஏற்கமுடியாமல் அவர்களை பிரிப்பதற்காக கடத்தியதும் தெரியவந்தது.
பிடிப்பட்டவர்கள் அளித்த தகவலின்பேரில் கருங்கல்லூர் பகுதியிலுள்ள அரசு பள்ளி வளாகத்தில் அடைத்து வைக்கப்பட்ட ஈஸ்வரன், செல்வனை மீட்டனர்.
இதைத்தொடர்ந்து இருவரையும் தாக்கியவர்களையும் காவல்துறையினர் பிடித்து தொடர்ந்து விசாரித்து வருகின்றனர். இந்த நிலையில், கடத்தலில் ஈடுபட்ட அரசியல் கட்சியினரை கைது செய்யக்கோரி, திராவிடர் விடுதலைக் கழகத்தினர், அப்பகுதி பொதுமக்கள் கொளத்தூர் காவல் நிலையத்தை முற்றுகையிட்ட சம்பவம் பெரும் பரபரப்பை ஏற்படுத்தியது.
சாதி மறுப்பு திருமணம் செய்த தம்பதியரை கடத்தி தாக்குதல் நடத்திய சம்பவத்தை அடுத்து, அப்பகுதியில் ஏராளமான காவல்துறையினர் குவிக்கப்பட்டுள்ளனர்.
இதையும் படிங்க: சாதி மறுப்புத் திருமணம் செய்த தம்பதியரின் உயிருக்கு அச்சுறுத்தல்: பாதுகாப்பு வழங்க உச்ச நீதிமன்றம் உத்தரவு!
