தேசிய மனித உரிமை அமைப்புகளின் கூட்டமைப்பு தலைவர் பேராசிரியர் அ.மார்க்ஸ் தலைமையில், 8 வழி சாலை எதிர்ப்புக் கூட்டமைப்பு ஆலோசனை கூட்டம் சேலத்தில் நடைபெற்றது . இதில் 32 விவசாய மற்றும் மனித உரிமைகள் அமைப்பு நிர்வாகிகள் கலந்து கொண்டனர். இந்த கூட்டத்திற்கு பிறகு செய்தியாளர்களை சந்தித்து பேசிய மார்க்ஸ், கிருஷ்ணகிரி மாவட்ட விவசாயிகளை சந்திக்கச் சென்றபோது மனித உரிமை அமைப்புகளின் கூட்டமைப்பின் பிரதிநிதிகளை காவல்துறையினர் அனுமதிக்கவில்லை என்றும், அதேபோல் சேலத்தில் ஒரு செய்தியாளர் சந்திப்புக்கு இந்த அமைப்பு ஏற்பாடு செய்திருந்ததையும் காவல்துறையினர் தடுத்துவிட்டனர் என்றும் குற்றஞ்சாட்டினார்.
அந்த தடையையும் மீறி செய்தியாளர் சந்திப்பு வேறு ஒரு இடத்தில் நடத்தப்பட்டது. இதனால் ஆத்திரமடைந்த போலீசார், இந்த சந்திப்பிற்கு இடம் கொடுத்தவர்களை மிரட்டியுள்ளதாகவும் அவர் கூறினார். மேலும், பொதுமக்கள் மற்றும் விவசாயிகளின் கருத்துக்களை கேட்காமல் வெறும் ஆறே நாளில் இந்தத் திட்டத்திற்கு மத்திய மாநில அரசுகள் ஒப்புதல் வழங்கிய செயல் ஜனநாயகத்திற்கு எதிரானது. எட்டு வழி சாலை திட்டத்திற்கு எதிர்ப்பு எந்தப் பகுதியிலும் இருந்து வந்து விடக்கூடாது என தமிழக அரசு நினைப்பதும் கண்டனத்திற்குரியது என்றும் அவர் தெரிவித்திருந்தார். இனி வரும் நாட்களில் 8 வழிச் சாலை எதிர்ப்புக் கூட்டமைப்பு செயல்படாமல் இருக்க அரசு தரப்பில் எடுக்கப்படும் முயற்சிகளை முறியடித்து அனைத்து அரசியல் கட்சிகளின் ஒத்துழைப்போடு விவசாயிகளின் நலனை பாதுகாக்க பல்வேறு கட்ட போராட்டங்களை நடத்தப்படும் என்றும் மார்க்ஸ் தெரிவித்தார்.
