சேலம்: சேலத்தில் குப்பனூர் வழியாக ஏற்காட்டிற்குச் செல்லும் வழியில் உள்ளது கொட்டசேடு. இந்தப் பகுதியில் 30க்கும் மேற்பட்ட குடும்பத்தினர் வசித்து வருகின்றனர். கடந்த 30 ஆண்டுகளுக்கு மேலாகச் சாலை வசதி செய்து தரக்கோரி அரசுக்கு பல்வேறு கோரிக்கைகளையும் போராட்டங்களையும் நடத்தி வந்த நிலையில் அரசு எந்த ஒரு நடவடிக்கையும் எடுக்காமல் காலம் தாழ்த்தி வந்துள்ளது.
மேலும், இங்கு உள்ள கிராம மக்களுக்கு மருத்துவம், நியாயவிலைக்கடை, அத்தியாவசிய தேவைகளுக்கு 35 கிலோ மீட்டர் கடந்து செல்கின்றனர். மாணவ-மாணவிகள் நாள்தோறும் பள்ளிகளுக்கு 8 கிலோமீட்டர் நடந்து சென்று தான் பள்ளிகளுக்குச் சென்று வருகின்றனர்.
இந்த நிலையில் இன்று நீதிமன்ற உத்தரவுப்படி நார்த்தஞ்சேடு கிராமத்திற்குச் சாலை அமைப்பதற்கு வருவாய்த்துறை அதிகாரிகள் மற்றும் காவல்துறை அதிகாரிகள் அளவிடும் பணியைத் தொடங்கினர். அப்பொழுது அருகாமையில் உள்ள செந்திட்டு, சின்னமலர், பெரியமதூர், பலகாடு, அரங்கம் உள்ளிட்ட 18 கிராமங்களுக்குச் சாலை அமைக்காமல் மாறாக ஒரு கிராமம் உள்ள பகுதிக்கும் தனியார் எஸ்டேட் உரிமையாளர்களுக்கு ஆதரவாகச் சாலை அமைக்க அளவிடும் பணி நடைபெறுவதால் ஆத்திரமடைந்த மக்கள் அளவிடும் பணியை மேற்கொள்ள விடாமல் வருவாய்த்துறை அதிகாரிகள் மற்றும் காவல் துறையினருடன் கடும் வாக்குவாதத்தில் ஈடுபட்டனர்.
மேலும் அளவிடும் பணியைத் தடுக்க முயன்ற நிலையில் காவலர்கள் அனைவரையும் தடுத்து நிறுத்தினர். அந்த கிராம மக்கள் காவலர்களைக் கீழே தள்ளிவிட்டு அளவிடும் அதிகாரிகளை முற்றுகையிட்டு கடும் வாக்குவாதத்தில் ஈடுபட்டனர்.இதனையடுத்து ஏற்காடு செல்லும் பிரதான சாலையில் அமர்ந்து அளவிடும் பணியைக் கைவிட வலியுறுத்தி சாலை மறியல் போராட்டத்தில் ஈடுபட்டனர். இதனால் அப்பகுதியில் போக்குவரத்து பாதிப்பு ஏற்பட்டு ஏராளமான வாகனங்கள் மலைப்பாதையில் காத்திருக்கிறது.
அளவிடும் பணியைக் கைவிடும் வரை களைய மாட்டோம் என்று பொதுமக்கள் சாலை மறியல் போராட்டத்தில் ஈடுபட்டு வருவதால் அப்பகுதியில் பெரும் பரபரப்பு நிலை வருகிறது. மேலும் அந்தப் பகுதியில் 200க்கும் மேற்பட்ட காவல்துறையினர் குவிக்கப்பட்டுப் பாதுகாப்புப் பணியில் ஈடுபடுத்தப்பட்டுள்ளனர்.
இதையும் படிங்க:"கேரளாவை பின்பற்றி நலத்திட்டங்களை செய்க" தமிழ்நாடு அரசுக்கு ஓய்வு பெற்ற காவலர்கள் கோரிக்கை!
