சேலம் மாவட்டம், மேட்டூர் அணையின் நடுவே உள்ள சிவன் கோயிலை, போன ஜென்மத்தில் நான் தான் கட்டினேன் என்றும், அதன் மூலவரான சிவலிங்கம் என்னிடம் தான் உள்ளது என்றும் நித்யானந்தா சமூக வலைத்தளங்களில் தகவல்கள் வெளியிட்டதாகக் கூறப்படுகிறது. இதனையடுத்து அவர் மீது, பாலவாடி ஜலகண்டேஸ்வரர் கோயிலுக்குச் சொந்தமான சிவலிங்கத்தை திருடிச் சென்றதாக கொளத்தூர் காவல் நிலையத்தில் புகார் அளிக்கப்பட்டது.
ஆனால் அந்த புகார் மீது காவல்துறையினர் நடவடிக்கை எடுக்கவில்லை என்று கூறப்படுகிறது. இதுதொடர்பாக கொளத்தூர் காவல் நிலையத்தில் நித்யானந்தா மீது புகார் அளித்த சக்திவேல் என்பவரிடம் விசாரித்தபோது," யூ டியூபில் நித்யானந்தா, சிவலிங்கம் என்னிடம் தான் உள்ளது என்று கூறியிருக்கிறார். அதனால் அவரிடமிருந்து சிவலிங்கத்தை மீட்டுத் தரும்படி காவல் நிலையத்தில் புகார் அளித்தோம். ஆனால் காவல்துறையினர், இந்து சமய அறநிலையத் துறை அதிகாரிகளிடம் புகார் அளிக்க வேண்டும் என்று கூறிவிட்டனர்.
சிஎஸ்ஆர் பதிவு கூட காவல்துறையினர் செய்ய மறுத்துவிட்டனர் . இதனையடுத்து ஆன்லைன் மூலமாக புகார் அளித்திருக்கிறோம் . அதன் ரசீது எங்களிடம் உள்ளது. அதனை கொண்டு மேட்டூர் நீதிமன்றத்தில் புகாரை பதிவு செய்யாத காவல்துறையினர் மீது நடவடிக்கை எடுக்கவும் புகாரை பதிவு செய்ய வலியுறுத்தவும் கோரி மனு அளிக்க இருக்கிறோம் என்றார்.
இந்தப் புகார் தொடர்பாக கொளத்தூர் காவல் நிலைய ஆய்வாளர் சக்கரபாணி (பொறுப்பு)யிடம் விசாரித்தபோது," சிவலிங்கம் இருந்ததற்கான ஆதாரங்களை மனுதாரர்கள் ஒப்படைக்கவில்லை. அதை ஒப்படைக்குமாறு அவர்களிடம் அறிவுறுத்தி இருக்கிறோம். மேலும் இதுதொடர்பாக இந்து சமய அறநிலையத்துறை அதிகாரிகளை அணுகவும் கூறியிருக்கிறோம். ஆதாரம் இருக்கும் பட்சத்தில் அதன் மீது நடவடிக்கை எடுக்க இயலும் " என்றார்.
இதையும் படிங்க:
நித்யானந்தா மீது கொளத்தூர் காவல்நிலையத்தில் சிலை கடத்தல் புகார்
