சேலம்: இன்று (செப்.20) காலை முதல் தமிழகத்தில் 40க்கும் மேற்பட்ட இடங்களில் வருமான வரித்துறை சோதனை மேற்கொண்டு வருகிறது. இதன் ஒரு பகுதியாக மேட்டூர் அனல் மின் நிலையத்தில் வருமான வரித்துறையைச் சேர்ந்த ஐந்து பேர் கொண்ட அதிகாரிகள் குழு இன்று (செப்.20) காலை முதல் திடீர் சோதனையில் ஈடுபட்டு வருகின்றனர்.
கடந்த சில மாதங்களுக்கு முன்பாக சட்ட விரோத பணப் பரிமாற்றத் தடைச் சட்டத்தின் கீழ் அமைச்சர் செந்தில் பாலாஜி அமலாக்கத் துறையால் கைது செய்யப்பட்டார். இந்நிலையில், அமலாக்கத்துறை சோதனையைத் தொடர்ந்து. இதன் ஒரு பகுதியாக செந்தில் பாலாஜிக்கு நெருங்கியவர்களின் வீட்டிலும் அதிகாரிகள் சோதனை மேற்கொண்டு வருகின்றனர். அந்த வகையில், இன்று தமிழகத்தில் 40க்கும் மேற்பட்ட இடங்களில் வருமான வரித்துறை சோதனையை தீவிரப்படுத்தியுள்ளது.
இதை மையமாகக் கொண்டு நடைபெறும் சோதனைகளில் சேலம் அனல் மின்நிலையத்திலும் சோதனைகள் தொடங்கப்பட்டுள்ளது. சேலம் மாவட்டம் மேட்டூர் அனல் மின் நிலையத்தில் இரண்டு அலகுகள் செயல்பட்டு வருகிறது. இந்த அனல் மின் நிலையத்தில் மின் உற்பத்தி இயந்திரங்கள், பராமரிப்பு பணி மற்றும் கொள்முதல் செய்தல் உள்ளிட்ட பணிகளை சென்னையில் உள்ள ராதா இன்ஜினியரிங் கம்பெனி மேற்கொண்டு வருகிறது.
இந்த நிலையில், இந்த நிறுவனம் மீது வரி ஏய்ப்புகள் செய்ததாகவும், முறைகேடாக பணியாளர்களின் பணத்தை எடுத்ததாகவும் வருமான வரித்துறைக்கு பல புகார்கள் வந்தன. இதனையடுத்து இன்று காலை முதல் மேட்டூர் அனல் மின் நிலையத்தில் ஐந்து பேர் கொண்ட வருமான வரித்துறை அதிகாரிகள் சோதனை மேற்கொண்டு வருகின்றனர்.
இந்த சோதனையில் அனல் மின் நிலையத்தில் உள்ள கோப்புகள் மற்றும் கணிணிகளை அதிகாரிகள் தீவிரமாக ஆய்வு செய்து விசாரணை நடத்தி வருகின்றனர். வருமான வரித்துறை அதிகாரிகளின் திடீர் சோதனையால் மேட்டூர் அனல்மின் நிலைய வளாகம் பரபரப்புடன் காணப்பட்டது.
மேலும், அனல் மின் நிலையத்திற்கு மின்சாதனப் பொருட்கள் கொள்முதல் செய்தது, ஒப்பந்த ஊழியர்கள் பணிக்கு வராமலேயே பணிக்கு வந்ததாக கணக்கு காட்டி பணம் பெற்றது உள்ளிட்ட பல்வேறு புகாரின் பேரில் சோதனைகள் நடத்தப்பட்டதாகத் தெரிகிறது.
தற்போது மேட்டூர் அணல் மின் நிலையத்தில் 3 ஆயிரத்து 500க்கும் மேற்பட்ட பணியாளர்கள் பணியாற்றி வருகின்றனர். இவர்களில் ஒப்பந்த அடிப்படையில் ஆயிரத்து 500க்கும் மேற்பட்டோர் பணியாற்றி வரும் நிலையில், சோதனை காரணமாக பணிகள் ஏதும் பாதிக்கப்படாமல் தொடர்ந்து மின் உற்பத்தி நடைபெற்று வருகிறது என்று அனல் மின் நிலைய நிர்வாகம் தெரிவித்துள்ளது.
இதையும் படிங்க: தமிழகத்தில் 40க்கும் மேற்பட்ட இடங்களில் வருமான வரித்துறை அதிரடி சோதனை!
