மேட்டூர் அனல் மின் நிலையம் உலர் சாம்பல் ஒப்பந்தத்தில் முறைகேடுகள் இல்லை - மின் வாரிய தலைமைப் பொறியாளர்

சேலத்தில் உள்ள மேட்டூர் அனல் மின் நிலையத்தில் உலர் சாம்பல் ஒப்பந்தத்தில் முறைகேடுகள் எதுவும் இல்லை, என்று தமிழ்நாடு மின் வாரிய தலைமைப் பொறியாளர் அங்கு சித்ரா விளக்கம் அளித்துள்ளார்.

சேலம்: மேட்டூர் அனல் மின் நிலையத்தில் எரிக்கப்படும் நிலக்கரியில் இருந்து வெளியேற்றப்படும் உலர் சாம்பலை வெளியேற்ற தனியார் ஒப்பந்ததாரர்களுக்கு அனுமதி வழங்கப்படுவது வழக்கம்.

இந்த நிலையில் கடந்த ஒன்றரை ஆண்டுகளாக முறையான டெண்டர் விடப்பட்டு உலர் சாம்பல் வெளியே எடுத்துச் செல்லப்படவில்லை என்று புகார் எழுந்தது. அதனைத் தொடர்ந்து தமிழ்நாடு லாரி உரிமையாளர்கள் சம்மேளனத்தின் தலைவர் முருகன் வெங்கடாசலம், மேட்டூர் அனல் மின் நிலையம் தலைமை பொறியாளர் மற்றும் தலைமைச் செயலாளர் உள்ளிட்ட அரசு உயர் அதிகாரிகளுக்குப் புகார் மனுக்கள் அனுப்பினார்.

இதனையடுத்து துறை ரீதியான ஆலோசனைகள் மேற்கொள்ளப்பட்டு உலர் சாம்பல் ஒப்பந்தம் நிறுத்தி வைக்கப்பட்டதாகக் கூறப்படுகிறது. ஆனாலும் உலர் சாம்பல் தற்போதும் அனல் மின் நிலையத்தில் இருந்து வெளியே கொண்டு செல்லப்படுவதாகவும் அதற்கான அனுமதி தலைமைப் பொறியாளரால் வழங்கப்பட்டதாகவும் கூறப்படுகிறது.

தமிழ்நாடு மின் வாரிய தலைமைப் பொறியாளர் விளக்கம்: இதனையடுத்து, இது குறித்து தலைமைப் பொறியாளர் அங்கு சித்ராவிடம் தொடர்பு கொண்டு கேட்ட போது, ஒப்பந்தம் வழங்கப்படுவதில் முறைகேடுகள் எதுவும் நடைபெறவில்லை. ' ஸ்மூத்' ஆக பணிகள்‌ நடைபெறுகிறது. புகார்கள் எழ வேண்டிய தேவை இல்லை எனவும், பினாமி நிறுவனங்கள் எதுவும் இல்லை ' என்று தெரிவித்தார்.

இந்த நிலையில் தமிழ்நாடு மின்வாரிய அலுவலர் - தொழிலாளர் விடுதலை முன்னணியின் மாநில பொதுச் செயலாளர் கு.கா.பாவலன் அறிக்கை ஒன்றை வெளியிட்டுள்ளார். அதில்,' திமுக ஆட்சிக்கு வந்த பிறகு கடந்த ஓராண்டாகத்தான் உலர் சாம்பல் ஒப்பந்தம் மூலம் வெளியேற்றப்பட்டு வருகிறது. அதனால் மின்வாரியத்திற்கு வருவாய் கிடைக்கிறது.

முருகன் வெங்கடாச்சலம் பொய்யான குற்றத்தை பரப்பி வருகிறார்: இந்நிலையில் லாரி உரிமையாளர்கள் சம்மேளனத் தலைவர் முருகன் வெங்கடாசலம், தலைமை பொறியாளரைத் தினந்தோறும் சந்தித்து அவர் சொல்லும் ஒப்பந்ததாரர்களுக்கு மட்டுமே உலர் சாம்பலை எடுத்துச் செல்வதற்கு ஆணை வழங்க வேண்டும் என்று மிரட்டி அச்சுறுத்தி வருகிறார். அவ்வாறு மிரட்டி 15 கம்பெனிகளுக்கு 5000 டன் வீதம் 75 ஆயிரம் டன் உலர் சாம்பல் எடுத்துச் செல்வதற்கு ஆணை பெற்றுள்ளார்.

நிலைமை இவ்வாறு இருக்கத் தலைமை பொறியாளர் திருமதி அங்கு சித்ரா அவர்கள் தனது பினாமி கம்பெனிகளுக்கு உலர் சாம்பல் ஒப்பந்தம் வழங்கி வருகிறார் என்று அவர் மீது அபாண்டமாக பொய்யான குற்றத்தை முருகன் வெங்கடாச்சலம் சுமத்தி வருகிறார். அவர் எத்தனை முறை அனல் மின் நிலையத்திற்குள் நுழைந்தார் என்பதை சிசிடிவி கேமராக்களை ஆய்வு செய்தாலே தெரிய வரும் என்றார்.

தான் செய்யும் அத்துமீறலை மறைப்பதற்காகவும், தன்னை தற்காத்துக் கொள்வதற்காகவும் தான் ஒரு நியாயவாதி என்பதைப் போலவும் நேர்மையான ஆள் என்பதைக் காட்டிக் கொள்ளவும் தனக்குக் கொலை மிரட்டல் வருவதாகவும் பொய்யான வதந்திகளைப் பரப்புகிறார். அத்துடன், அரசு உயர் அதிகாரிகளுக்குப் பொய்யான செய்திகளைப் புகார் அளித்தும் வருகிறார்.

மேலும் ஒப்பந்ததாரர்களுக்கு இடையே உள்ளூர் வெளியூர் என்கிற பாகுபாட்டை உருவாக்கி அவர்களுக்குள் மோதலை உண்டு பண்ணும் போக்கை கடைபிடித்து வருவதுடன், ஒப்பந்ததாரர்களிடையே சாதி பிரிவினையையும் பெரிதுபடுத்தி வருகிறார். மேலும் தலைமை பொறியாளரை மிரட்டுவதற்கு உடன் பத்து நபர்களையும் கூட்டிச் செல்கிறார். அவரால் மேட்டூரில் சட்டம் ஒழுங்கு சீர்கெடவும் வாய்ப்பு இருக்கிறது.

மேட்டூர் அனல்மின் நிலையத்தில் உலர் சாம்பல் வெளியேற்றுவதில் பெரும் தடைகளை ஏற்படுத்தி நிர்வாகத்தைச் செயல்பட விடாமல் முடக்குகிறார். நான் கருணாநிதியை மிரட்டியவன், அதிமுக ஆட்சியின் போது மின்துறை அமைச்சராக இருந்த தங்கமணியை மிரட்டி இருக்கிறேன்.

ஆகவே நான் யாருக்கும் அஞ்ச மாட்டேன் எல்லோரையும் மிரட்டி அடிபணிய வைப்பேன் என்றும் லாரிகளை அனல் மின்நிலையத்தின் வாசலில் குறுக்கே நிறுத்தி போராட்டம் நடத்துவேன் என்றெல்லாம் தலைமை பொறியாளரை மிரட்டி வருகிறார்.

ஏற்கனவே 2015 முதல் 2018 வரை மூன்றாண்டுகள் வெட் சாம்பல் ஏலத்தை நடத்தவிடாமல் மின்வாரியத்தில் பெரும் நஷ்டத்தை ஏற்படுத்தினார். பிறகு டால்மியா நிறுவனம் ஏலத்தை எடுத்ததும் அந்நிறுவனத்தோடு தகராறு செய்து அவர்களிடமிருந்து ஒப்பந்தப் பணிகளைப் பெற்று கொள்ளை லாபம் அடித்து வருகிறார். தற்போது அவர் உலர் சாம்பல் ஒப்பந்தப் பணியிலும் மின்வாரிய நிர்வாகத்தை மிரட்டத் தொடங்கிவிட்டார்.

ஆகவே, அரசு நிர்வாகத்தைச் செயல்படவிடாமல் தடுப்பதும், அரசு அதிகாரி அவர்களின் தன்னிச்சையான அதிகாரத்தில் தலையிடுவதும் சட்டப்படி குற்றமாதலால் காவல்துறை முருகன் வெங்கடாசலத்தின் மீது வழக்குப் பதிவு செய்து உரிய நடவடிக்கை எடுத்தால் தான் மேட்டூர் அனல்மின் நிலையம் நிர்வாகம் சுதந்திரமாகச் செயல்படுவதுடன், மின் உற்பத்தியும் தடையில்லாமல் நடக்கும் என்பதைத் தெரிவித்துக் கொள்கிறேன்.' என்று குறிப்பிட்டு உள்ளார்.

இதையும் படிங்க:விசிகவினர் கலவரத்தை தூண்ட முயற்சிப்பதாக மாவட்ட ஆட்சியரிடம் புகார்!