ஆற்காடு: ராணிப்பேட்டை மாவட்டம் நந்தியாலயம் மேட்டுத் தெருவை சேர்ந்தவர் ஆறுமுகம் (39). கூலித் தொழில் செய்து வருகிறார். இவரது மகன் பரத் (13). ஆறுமுகமும், மகன் பரத்தும் வீட்டின் அருகே உள்ள ஏரிக்கு சென்று மீன்பிடிப்பது வழக்கம். இந்நிலையில் நேற்று (பிப்.12) இருவரும் மீன்பிடிக்க ஏரிக்கு சென்றுள்ளனர்.
ஏரியின் ஆழமான பகுதிக்கு சென்ற ஆறுமுகம், வலையை வீசும் போது நிலைதடுமாறி நீரில் மூழ்கியதாக கூறப்படுகிறது. இதைக்கண்டு அதிர்ச்சியடைந்த மகன் பரத், தந்தையை காப்பாற்றுவதற்காக ஏரியில் குதித்துள்ளார். ஆனால் அவரும் நீரில் மூழ்கியதால், தந்தையும், மகனும் மாயமாகினர்.
இதைக்கண்ட அங்கிருந்தவர்கள் ஆற்காடு போலீசார் மற்றும் தீயணைப்புத்துறையினருக்கு தகவல் தெரிவித்தனர். சம்பவ இடத்துக்கு விரைந்து வந்த தீயணைப்புத்துறையினர், நீரில் மூழ்கிய இருவரையும் தீவிரமாக தேடினர்.
பல மணி நேர தேடுதலுக்கு பிறகு ஆறுமுகம் மற்றும் அவரது மகன் பரத்தை, தீயணைப்புத்துறையினர் சடலமாக மீட்டனர். இருவரது சடலங்களை பார்த்து குடும்பத்தினர் கதறினர். பின்னர் உடல்களை கைப்பற்றிய போலீசார், உடற்கூராய்வுக்காக ஆற்காடு அரசு மருத்துவமனைக்கு அனுப்பி வைத்தனர். மேலும் இச்சம்பவம் குறித்து வழக்குப்பதிவு செய்து விசாரணை நடத்தி வருகின்றனர்.
ஏரிக்கு மீன்பிடிக்க சென்ற தந்தையும், மகனும் நீரில் மூழ்கி உயிரிழந்த சம்பவம் நந்தியாலயம் பகுதியில் சோகத்தை ஏற்படுத்தியிருக்கிறது. நீர் நிலைகளுக்கு குழந்தைகளுடன் செல்லும் பொதுமக்கள், எச்சரிக்கையுடன் இருக்க வேண்டும் என போலீசார் அறிவுறுத்தியுள்ளனர்.
இதையும் படிங்க: சென்னையில் 1 மணி நேரத்தில் 6 இடங்களில் செல்போன் பறிப்பு!
