வல்லம்பக்காடு ஊராட்சி ஒன்றிய தொடக்கப் பள்ளியில் 1ஆம் வகுப்பு முதல் 5ஆம் வகுப்பு வரை 95க்கும் மேற்பட்ட குழந்தைகள் கல்வி பயின்று வருகின்றனர். 95 குழந்தைகளுக்கும் ஒரே ஒரு ஆசிரியர் மட்டுமே பணியாற்றி வருவதாகத் தெரிகிறது. இதனால் கடந்த ஓராண்டு காலமாக ஆசிரியர் பற்றாக்குறையால் மாணவ, மாணவியர்கள் ஒழுங்காக படிக்க வில்லையென பெற்றோர்கள் குற்றம் சாட்டுகின்றனர்.
ஆசிரியர் பற்றாக்குறையைக் கண்டித்து துறை அதிகாரிகளிடம் சென்று முறையிடுகையில், விரைவில் ஆசிரியர்கள் நியமிக்கப்படுவார்கள் என்று அதிகாரிகள் தெரிவித்துள்ளனர். ஆனால் இதுவரை ஆசிரியர்கள் நியமிக்கப்படவில்லையென்றும், இதுவரை பணியாற்றி வந்த தற்காலிக பணியாளர்களும் தற்போது வரவில்லையெனவும் அப்பகுதி பெற்றோர்கள் குற்றம் சாட்டுகின்றனர்.
தனியார் பள்ளியை நோக்கி பெற்றோர்கள் தங்களது குழந்தைகளை சேர்க்க முயலுகின்ற, காலகட்டத்தில் தங்கள் பகுதி ஊராட்சி ஒன்றிய அரசுப் பள்ளியில் மட்டும் 95க்கும் மேற்பட்ட குழந்தைகள் பயின்று வந்தும் அதற்கு போதிய ஆசிரியர்கள் இல்லாதது வேதனையளிப்பதாக பெற்றோர்கள் தெரிவித்தனர்.
எனவே 95 மாணவர்களுக்கும் அந்தந்த வகுப்பிற்கு ஏற்ற ஆசிரியர்களை நியமிக்க வேண்டும் என்றும், அதுவரை குழந்தைகளை பள்ளிக்கு அனுப்பாமல் போராட்டத்தில் ஈடுபட போவதாகவும் தெரிவித்துள்ளனர். இதனால், அப்பகுதியில் பரபரப்பு ஏற்பட்டுள்ளது.
