புதுக்கோட்டை மாவட்டம் அறந்தாங்கி அருகே கீரமங்கலத்தில் இந்திய கம்யூனிஸ்ட் கட்சியின் மாநிலச் செயலாளர் முத்தரசன் செய்தியாளர்களைச் சந்தித்தார். அப்போது பேசிய அவர், 'கொரோனா வைரஸ் சீனாவில் பரவி வரும் நிலையில், தமிழ்நாட்டின் பல பகுதிகளிலிருந்தும் படிப்பிற்காக சீனா சென்றுள்ள மாணவர்களை மீட்க தமிழ்நாடு அரசு எந்த நடவடிக்கையும் எடுக்கவில்லை. ஆர்எஸ்எஸ் அமைப்பினர் ராணுவப் பயிற்சிப் பள்ளி நடத்துவது என்பது அபாயகரமானது. இதற்கு முன்பு முப்படைத் தளபதி அரசியல் பேசியது பரபரப்பாக உள்ள நிலையில், இப்போது ஆர்எஸ்எஸ் ராணுவப் பயிற்சிப் பள்ளி நடத்துவது என்பது அபாயத்தையும் அச்சத்தையும் ஏற்படுத்தியுள்ளது.
நெடுவாசல் ஹைட்ரோ கார்பன் போராட்டம் தொடங்கியது. அதை இந்திய கம்யூனிஸ்ட் கட்சிதான் தொடங்கி வைத்தது. அப்போது வந்த அன்றைய மத்திய இணையமைச்சர் பொன். ராதாகிருஷ்ணன் நெடுவாசல் பிரதிநிதிகளை டெல்லி வரை அழைத்துச் சென்றார். மக்கள் விரும்பாத எந்தத் திட்டத்தையும் செயல்படுத்த மாட்டோம் என்ற உறுதியை வாங்கிக்கொண்டு ஊருக்குத் திரும்புவதற்கு முன்பு இரண்டு நிறுவனங்களுக்கு மத்திய அரசு ஒப்பந்தம் போட்டது. தற்போது சுற்றுச்சூழல் அனுமதி தேவையில்லை, மக்கள் கருத்து தேவை இல்லை என்று அறிவிப்பு செய்துள்ளது.
இதனால் டெல்டா மாவட்டங்களில் போராட்டங்கள் தொடங்கியுள்ளது. புதுச்சேரி முதலமைச்சர் ஹைட்ரோ கார்பன் திட்டத்தை அனுமதிக்க மாட்டோம் என்று சொல்லிக் கொண்டிருக்கும் நிலையில் தமிழ்நாடு முதலமைச்சர் எடப்பாடி பழனிச்சாமி மவுனம் காத்து வருவது ஏன் என்பது தெரியவில்லை. பொது அறிவிப்பு செய்து அதற்கான காரணங்களைச் சொல்லவேண்டும். மவுனம் காத்து திட்டத்தினை கைவிட முயற்சிக்காமல் தப்ப முயலக்கூடாது. டொல்டா பகுதியில் நடந்த அனைத்து கிராம சபைக் கூட்டத்தில் ஹைட்ரோ கார்பன் திட்டம் வேண்டாம் என்று தீர்மானங்கள் நிறைவேற்றப்பட்டுள்ளது. இதற்கு மத்திய, மாநில அரசுகள் மதிப்பு கொடுக்க வேண்டும். இல்லையென்றால் தீவிரமான போராட்டங்களை முன்னெடுத்துச் செல்வோம்.
ரஜினி இரட்டைவேடம் போட்டுக் கொண்டிருக்கிறார். அவருடைய படங்கள் பார்ப்பதற்கு திரையரங்குகளில் மூட்டைப்பூச்சிகள் மட்டுமே இருப்பதாகத் தெரியவருகிறது.
தஞ்சை பெரிய கோயில் குடமுழுக்கு தமிழில் செய்ய வேண்டும் என்பதே அனைவரின் கோரிக்கையாக இருக்கிறது. இதற்கு இந்திய கம்யூனிஸ்ட் கட்சி முதலில் தீர்மானம் நிறைவேற்றியுள்ளது. இதை மாநில அரசு நினைத்தால் செய்ய முடியும். ஆனால் முதலமைச்சர் எடப்பாடி பழனிசாமி வாயைத் திறக்க மாட்டேன் என்கிறார். அவர்கள் கூட்டணியில் உள்ள பாமக இது குறித்து தீர்மானம் நிறைவேற்றி இருக்கிறது. பாஜக தவிர மற்ற அனைவரும் தமிழில் குடமுழுக்கு நடத்த வேண்டும் என ஆதரிக்கிறார்கள். தமிழ்நாட்டு சாமிகளுக்கு தமிழில் சொல்வது தான் புரியும்.
தமிழ்நாட்டில் பேரூராட்சி, நகராட்சி, மாநகராட்சி தேர்தல்கள் நடத்துவது எப்போது என்பது தெரியாது. அது இரண்டு பழனிசாமிகளுக்கு மட்டும்தான் தெரியும். ஒன்று முதலமைச்சர் பழனிசாமி மற்றொன்று தேர்தல் ஆணையர் பழனிச்சாமி.
குடியுரிமை திருத்தச் சட்டத்திற்கு எதிராக திமுக கூட்டணி கட்சிகள் அனைவரும் கையெழுத்து இயக்கம் தமிழ்நாடு முழுவதும் நடத்துவது என முடிவு செய்துள்ளனர். திமுக கூட்டணியை எந்த காலத்திலும் உடைக்க முடியாது. ஆனால் இக்கூட்டணியை உடைக்க வேண்டும் என்று பலரும் நினைக்கிறார்கள். அது என்றும் முடியாத ஒன்று' எனக் கூறினார்.
இதையும் படிங்க:
‘ஓ.எஸ். மணியன் இந்திய குடிமகனே இல்லையென்ற நிலை ஏற்படலாம்’ - முத்தரசன்
