புதுக்கோட்டை: சென்னையில் விரைவில் நடைபெற உள்ள ஆசிய கோப்பை ஹாக்கி போட்டியின் கோப்பை அறிமுக விழா புதுக்கோட்டை மாவட்ட விளையாட்டு அரங்கில் நடைபெற்றது. சட்டத்துறை அமைச்சர் ரகுபதி மற்றும் மாவட்ட ஆட்சியர் மெர்சி ரம்யா, எம்எல்ஏ முத்துராஜா ஆகியோர் கோப்பையை அறிமுகம் செய்து வைத்தனர்.
இதன் பின்னர் செய்தியாளர்களிடம் பேசிய அமைச்சர் ரகுபதி, “நிலுவையில் உள்ள சட்ட மசோதாக்கள் குறித்து எந்த விதமான விளக்கமும், மறுப்போ ஆளுநரிடமிருந்து இதுவரை தமிழக அரசு பெறவில்லை. ஆன்லைன் சூதாட்ட தடை வழக்கு விவகாரத்தில், தமிழக அரசு உரிய பதில் மனுவை நீதிமன்றத்தில் தகவல் செய்துள்ளது.
சிறைத்துறையில் முதல் வகுப்பு சிறைவாசிகளுக்கு வழங்கப்படும் சலுகைகள் மட்டும் தான் செந்தில்பாலாஜிக்கும் வழங்கப்படுகிறது. அவருக்கு வேற எந்த சலுகைகளும் சிறைத்துறை சார்பில் வழங்கப்படவில்லை. தற்போது அவருடைய வழக்கு விசாரணைக்கு வருவதால் செந்தில் பாலாஜிக்கு இடையூறு செய்ய வேண்டும் என்பதற்காக சிறையில் அவருக்கு சலுகைகள் வழங்கப்படுவது போல் மாய தோற்றத்தை சிலர் உருவாக்க முயற்சிக்கிறார்கள்.
இந்த வழக்கு உச்ச நீதிமன்றம், உயர் நீதிமன்றம் சார்பில் விசாரிக்கப்பட்டு வருவதால் வழக்கில் குழப்பத்தை ஏற்படுத்த வேண்டும் என்பதற்காக முயற்சி நடக்கிறது. சிறையில் சிறப்பு சலுகைகள் வழங்கப்படுவதை தமிழக முதல்வர் விரும்ப மாட்டார் அதுபோன்று எதுவும் நடக்கவில்லை. கோடநாடு விவகாரத்தில் உண்மை குற்றவாளிகள் விரைவில் சட்டத்தின் முன் நிறுத்தப்படுவார்கள், அவர்கள் எந்த உயர் பதவியில் இருந்தவர்களாக இருந்தாலும் அவர்கள் தப்ப முடியாது அவர்கள் மீது கடுமையான நடவடிக்கை எடுக்கப்படும்.
முன்னாள் முதல்வர் ஜெயலலிதாவின் லஞ்ச ஒழிப்பு புகாரில் பறிமுதல் செய்யப்பட்ட பொருட்கள் நீதிமன்ற உத்தரவுப்படி யாரிடம் ஒப்படைக்க வேண்டுமோ அவர்களிடம் தான் ஒப்படைக்கப்பட்டுள்ளது. மூன்றாவது நபர்களிடம் ஒப்படைக்க முடியாது, அதுபோன்று யாரிடமும் லஞ்ச ஒழிப்புத்துறை ஜெயலலிதாவின் பொருட்களை ஒப்படைக்கவில்லை.
முன்னாள் முதல்வர் ஜெயலலிதாவின் பறிமுதல் செய்யப்பட்ட பொருட்கள் பெங்களூர் நீதிமன்றத்தில் பல பொருட்கள் இல்லை என்ற குற்றச்சாட்டு குறித்து எங்களுக்கு எந்த தகவலும் இல்லை. மேலும் மேகதாது விவகாரத்தில் நீர்வளத்துறைத் அமைச்சர் சட்டபூர்வமாக என்ன நடவடிக்கை எடுக்க வேண்டுமோ அதனை எடுப்பார்.
நீதிமன்றத்தில் ஏற்கனவே நடைமுறையில் உள்ளபடி அம்பேத்கர் உள்ளிட்ட புகைப்படங்கள் இருக்கலாம் என்று நீதிமன்றம் தற்போது கருத்து தெரிவித்துள்ளது. புதிதாக விதிக்கப்பட்ட விதிமுறைகள் நிறுத்தி வைக்கப்படுவதாகவும் நீதித்துறை அரசிற்கு தகவல் தெரிவித்துள்ளது. ஆண்டுக்கான குறிப்பிட்ட நேரங்களில் விலைவாசி உயர்வு ஏற்படுவது இயற்கை தான்.
தமிழக அரசு பொறுத்தவரை விலைவாசியை கட்டுக்குள் வைத்துள்ளோம். இரண்டு ஆண்டு காலமாக விலைவாசி உயர்வை கட்டுக்குள் தான் வைத்து வருகிறோம். ஒரு சிலர் பதுக்கல் உள்ளிட்டவைகளில் ஈடுபட்டு வருகின்றனர். அவர்களை கண்டறிந்து அவர்கள் மீது கடும் நடவடிக்கை எடுக்க நடவடிக்கை எடுக்கப்பட்டு வருகிறது” எனத் தெரிவித்தார்.
