புதுக்கோட்டை: முத்துப்பட்டினம் கிராமத்தைச் சேர்ந்த தொழிலதிபர் எஸ்.ஆர் என்ற எஸ்.ராமச்சந்திரன். இவர் அரசு மணல் குவாரி ஒப்பந்ததாரராகவும், ரியல் எஸ்டேட், கல் குவாரி, சோலார் பவர் பிளான்ட் போன்ற தொழில்களிலும் ஈடுபட்டு வருகிறார். இது மட்டுமின்றி புதுக்கோட்டை மாவட்ட கம்பன் கழகத் தலைவராகவும் உள்ளார். 2016 ஆம் ஆண்டு எஸ்.ராமச்சந்திரன் மீது வருமானத்திற்கு அதிகமாக சொத்து சேர்த்ததாகவும், வரி ஏய்ப்பு செய்ததாகவும் வழக்குப் பதிவு செய்து சோதனை மேற்கொண்டு, அவரை கைது செய்து விசாரணை நடத்தி சிறையில் அடைத்திருந்தனர்.
இதனைத் தொடர்ந்து கடந்து 2016 ஆம் ஆண்டு அமலாக்க துறையினர் சோதனை மேற்கொண்ட போது கைப்பற்றப்பட்ட ஆவணங்களை வைத்து அடுத்த கட்ட விசாரணையாக, தற்சமயம் புதுக்கோட்டை மாவட்டத்தில் முத்துப்பட்டினத்தில் உள்ள அவரது வீடு, புதுக்கோட்டையில் நிஜாம் காலனியில் உள்ள அவரது அலுவலகம், வடக்கு ராஜா வீதியில் உள்ள முருகபாலா ஆர்கிடெக்ட் அலுவலகம், அரியாணிபட்டியில் உள்ள ராமச்சந்திரன் பினாமி என சொல்லக்கூடிய சண்முகம் என்பவருக்கு சொந்தமான செம்மண் குவாரி போன்றவற்றிலும் அமலாக்க துறையினர் சோதனை நடத்தினர்.
மேலும் மலவராயன் பட்டியை சேர்ந்த ராமச்சந்திரனின் உறவினரான வீரப்பன், புதுக்கோட்டை ஏ.எம்.ஏ நகரை சேர்ந்த ராமச்சந்திரனின் தொழில் நண்பரான மணிவண்ணனுக்கு சொந்தமான வீடு மற்றும் புதுக்கோட்டை கே.எல்.கே.எஸ் நகரை சேர்ந்த ஆடிட்டர் முருகேசன் வீடு, திண்டுக்கல் ரத்தினம் உறவினரான கரிகாலனுக்கு சொந்தமான வீடு, அரசு ஒப்பந்ததாரர் கர்ணன் வீடு ஆகிய ஒன்பது இடங்களில் அமலாக்க துறையினர் சோதனை நடத்தப்பட்டது.
இந்த சோதனையின் போது துப்பாக்கி ஏந்திய காவல்துறையினர் பாதுகாப்பு பணியில் ஈடுபட்டிருந்தனர். கடந்த மூன்று நாட்களாக நடைபெற்ற சோதனையில், ஐந்து இடங்களில் சோதனை நிறைவு பெற்ற நிலையில், ராமச்சந்திரனது அலுவலகத்தில் தொடர்ந்து சோதனை நடைபெற்று வந்தது. இந்த சோதனையில் இருந்து பல முக்கிய ஆவணங்கள் மற்றும் ரசீது புத்தகங்கள் ஆகியவற்றை கட்டு கட்டாக அமலாக்கத்துறையினர் அள்ளி சென்றனர்.
மணல் குவாரிகளில், மணல் லாரிகளுக்கு அனுமதி அளிக்க பயன்படுத்தப்படும் ரசீது நோட்டுகளை அதிக அளவில் அமலாக்க துறையினர் அள்ளி சென்றுள்ளனர். அமலாக்கத்துறை அதிகாரிகள் கைப்பற்றிய ஆவணங்களை இரண்டு வாகனங்களில் கொண்டு சென்றனர். இதில் பல்வேறு முக்கிய ஆவணங்கள் சிக்கி உள்ளதால் தொழிலதிபர் எஸ்.ராமச்சந்திரனுக்கு சம்மன் அனுப்பி விசாரணை நடத்த உள்ளதாக தகவல் வெளியாகி உள்ளது.
இதையும் படிங்க: அரசு மணல் குவாரி ஒப்பந்ததாரர் ராமச்சந்திரனுக்கு சொந்தமான இடங்களில் அமலாக்கத்துறை சோதனை!
