புதுக்கோட்டை மாவட்ட அங்கன்வாடி ஊழியர் மற்றும் உதவியாளர் சங்கத்தின் சார்பில் 13 அம்ச கோரிக்கைகளை வலியுறுத்தி 200-க்கும் மேற்பட்ட பெண்கள் மாவட்ட ஆட்சியர் அலுவலகம் முன்பு ஆர்ப்பாட்டத்தில் ஈடுபட்டனர்.
ஆர்ப்பாட்டத்தில் அங்கன்வாடி ஊழியர் மற்றும் உதவியாளர் சங்கத்தின் மாவட்ட துணைத் தலைவர் செல்வம், இணைச் செயலாளர் பத்மா, மாவட்டச் செயலாளர் பச்சையம்மாள் ஆகியோரின் தலைமையில் 13 அம்ச கோரிக்கைகள் வலியுறுத்தப்பட்டன.
அங்கன்வாடி ஊழியர்களை அரசு ஊழியர்களாக்கி குறைந்தபட்ச ஊதியம் 24 ஆயிரம் ரூபாய் வழங்க வேண்டும், உதவியாளர்களுக்கு குறைந்தபட்ச ஊதியம் 18 ஆயிரம் ரூபாய் வழங்க வேண்டும்,
அங்கன்வாடி ஊழியர்களுக்கு குறைந்தபட்ச ஓய்வூதியம் ஒன்பதாயிரம் ரூபாய் வழங்க வேண்டும், உதவியாளர்களுக்கு ஐந்தாயிரம் ரூபாய் வழங்க வேண்டும், சுகாதாரத் துறை பணிகள் அனைத்தையும் அங்கன்வாடி ஊழியர்களைப் பார்க்கச் சொல்லி கட்டாயப்படுத்தக் கூடாது,
அங்கன்வாடி பணியாளர்களுக்கு பிரசவ கால விடுப்பு ஒன்பது மாதங்கள் வழங்க வேண்டும், கரோனா பணிகளில் ஈடுபட்ட அங்கன்வாடி ஊழியர்கள் உதவியாளர்களுக்கு ஊக்கத்தொகை வழங்க வேண்டும் உள்ளிட்ட 13 அம்ச கோரிக்கைகள் வலியுறுத்தப்பட்டன.
