பெரம்பலூர் அருகே உள்ள ஆலம்பாடி கிராமத்தைச் சேர்ந்தவர் ராஜலிங்கம் (47). இவர் கடந்த மே 28ஆம் தேதி வீட்டிலிருந்து வெளியே சென்றவர், பிறகு வீட்டிற்கு திரும்பவில்லை. இதையடுத்து அவரது உறவினர்கள் காணாமல் போனதாக ராஜலிங்கத்தை தேடிவந்துள்ளனர்.
இதனிடையே, பெரம்பலூரிலிருந்து ஆலம்பட்டி செல்லும் வழியில் உள்ள நகராட்சிக்கு சொந்தமான குடிநீர் கிணற்றில் ஆண் சடலம் கிடப்பதாகக் காவல் துறையினருக்கு தகவல் கிடைத்துள்ளது. இதையடுத்து சம்பவ இடத்திற்கு விரைந்த காவல் துறையினர், தீயணைப்புத் துறையினர் உதவியுடன் கிணற்றிலிருந்து சடலத்தை மீட்டு, ஊடற்கூறாய்வுக்காக பெரம்பலூர் அரசு மருத்துவமனைக்கு அனுப்பி வைத்தனர்.
இதுகுறித்து காவல் துறையினர் மேற்கொண்ட விசாரணையில், சடலமாக மீட்கப்பட்டது ராஜலிங்கம் என்பதை உறுதி செய்தனர். இதையடுத்து வழக்குபதிவு செய்த காவல் துறையினர், ராஜலிங்கம் கிணற்றில் தவறி விழுந்து உயிரிழந்தாரா அல்லது யாரேனும் அடித்து கொலை செய்து, உடலைக் கிணற்றில் வீசிச் சென்றனரா உள்ளிட்ட கோணங்களில் விசாரணையை முடுக்கிவிட்டுள்ளனர்.
இதையும் படிங்க: அழுகிய நிலையில் முதியவர் சடலம் கண்டெடுப்பு - போலீஸ் விசாரணை!
