நாமக்கல்: திமுகவின் விடியலை நோக்கி ஸ்டாலினின் குரல் நிகழ்ச்சியின் ஆலோசனை கூட்டம் நாமக்கல் மாவட்டம் பரமத்தி வேலூரில் இன்று (டிசம்பர் 15) நடைபெற்றது. இதில் திமுக சுற்றுச்சுழல் பாதுகாப்பு அணியின் மாநில செயலாளர் கார்த்திகேய சிவசேனாதிபதி, பரமத்தி வேலூர் சட்டப்பேரவை உறுப்பினர் கே.எஸ்.மூர்த்தி, விவசாயிகள், பொதுமக்கள் என பலர் கலந்துகொண்டனர்.
இந்த ஆலோசனை கூட்டத்திற்கு பின் செய்தியாளர்களிடம் பேசிய கார்த்திகேய சிவசேனாதிபதி, "தமிழ்நாட்டில் மின்சாரம் மின்மிகை மாநிலமாக ஆகிவிட்டது என ஒரு பொய்யான பரப்புரையை தமிழ்நாடு அரசு செய்துவருகிறது.
தமிழ்நாடு மின்மிகை மாநிலமாக என்றுமே ஆகவில்லை, தனியாரிடமிருந்து மின்சாரத்தை வாங்கி கொடுக்கப்படுகிறது. புதிதாக மின்சார உற்பத்தி செய்யக்கூடிய திட்டங்கள் எதுவுமே கடந்த 10 ஆண்டுகளில் உருவாக்கப்படவில்லை. அவ்வாறு உருவாக்கியிருந்தால் எந்த மாதிரியான திட்டங்களை செயல்படுத்தியுள்ளோம் என அதிமுகவினர் கணக்கு கொடுக்க வேண்டும்" என்றார்.
இதையும் படிங்க: 'அதிமுக மீண்டும் ஆட்சியில் அமர்வதை யாராலும் தடுக்க முடியாது'- அமைச்சர் செங்கோட்டையன்
