புதிய மோட்டார் வாகன சட்டம்: லாரி கூண்டு கட்டும் தொழிலில் லட்சக்கணக்கானோர் வேலையிழக்கும் அபாயம்!

நாமக்கல்: புதிய மோட்டார் வாகன சட்டத்தால் நாமக்கலைச் சுற்றி இயங்கிவரும் லாரி கூண்டு கட்டும் தொழில் அழியும் நிலைக்குத் தள்ளப்பட்டு, பல லட்சம் பேர் வேலையிழக்கும் சூழல் ஏற்படும் என அத்தொழில் நிறுவனத்தினர் வேதனை தெரிவித்துள்ளனர்.

நாமக்கல் என்றாலே லாரித் தொழிலும், கோழிப்பண்ணைத் தொழிலும்தான் ஞாபகத்திற்கு வரும். ஆனால் வரும் நவம்பர் 1ஆம் தேதி முதல் அமலாக உள்ள, புதிய மோட்டார் வாகன சட்டத்தால் நாமக்கல், திருச்செங்கோடு, சங்ககிரி உள்ளிட்ட பகுதிகளில் இயங்கிவரும் மூன்றாயிரத்திற்கும் மேற்பட்ட லாரி கூண்டு கட்டும் தொழில் (லாரி பாடி பில்டர்ஸ் தொழில்) நிறுவனங்கள் அழியும் நிலைக்குத் தள்ளப்பட்டுள்ளதாக அத்தொழிலில் ஈடுபட்டுள்ளவர்கள் கவலை தெரிவிக்கின்றனர்.

சர்வதேச தரத்திற்கு லாரி கூண்டு கட்டும் தொழிலை எடுத்துச் செல்லும் நோக்கத்துடன் புதிய மோட்டார் வாகன சட்டத்தைக் கொண்டு வரப்போவதாக மத்திய அரசு கூறுகிறது. இத்தொழிலில் தற்போது ஈடுபட்டுள்ளவர்கள் சுமார் 20 முதல் 30 ஆண்டுகள் அனுபவ அடிப்படையிலேயே இத்தொழிலைச் செய்துவருகின்றனர்.

ஆனால் இந்தப் புதிய மோட்டார் வாகன சட்டமானது கூண்டு கட்டும் தொழிலில் ஈடுபடுபவர்கள் சொந்தமாக 12 ஆயிரம் சதுர அடிகள் நிலம் குத்தகை அடிப்படையில் வைத்திருக்க வேண்டும், அங்கு பணியாற்றும் தொழிலாளர்கள் தொழிற்பயிற்சி (ஐ.டி.ஐ.) கட்டாயம் படித்திருக்க வேண்டும், ஏ.ஆர்.ஏ.ஐ (ARAI) தரச் சான்று பெற்றிருக்க வேண்டும் எனப் பல்வேறு விதிமுறைகளையும் வகுத்துள்ளது. இதுபோன்ற கட்டுப்பாடுகளால் கூண்டு கட்டும் தொழில் நசுக்கப்பட்டு, கார்ப்பரேட் நிறுவனங்களின் கைகளுக்கு இத்தொழில் செல்லும் நிலை ஏற்பட்டுள்ளதாக இத்தொழில் செய்பவர்கள் கூறுகின்றனர்.

முன்பெல்லாம் தமிழ்நாடு மட்டுமில்லாமல் கர்நாடகா, ஆந்திரா உள்ளிட்ட வெளி மாநிலங்களிலிருந்தும் இங்கு வந்து லாரிகளுக்குக் கூண்டு கட்டிச் சென்றனர். ஆனால் டோல் கட்டணம், ஜிஎஸ்டி வரி உயர்வு போன்றவற்றால் வெளியூர் லாரிகள் தற்போது கூண்டு கட்டும் பணிக்கு பெரும்பாலும் வருவதில்லை. இந்நிலையில், நவம்பர் 1ஆம் தேதி முதல் அமலுக்கு வரவுள்ள இந்தப் புதிய மோட்டார் வாகன சட்டம் உள்ளூர் லாரி கூண்டு கட்டும் தொழிலை நசுக்கி, பெரு நிறுவனங்களுக்குத் துணைபுரிவது போல் உள்ளதாக தொழிலில் ஈடுபடுபவர்கள் வருத்தம் தெரிவிக்கின்றனர்.

அரசின் எவ்வித உதவியுமின்றி கடந்த 40 ஆண்டுகளுக்கு மேலாக சிறு தொழிலாக லாரிகளுக்கு கூண்டு கட்டும் பணியில் தாங்கள் ஈடுபட்டு வருவதாகவும், புதியதாக அரசு சட்டம் கொண்டு வரும் முன் இத்தொழிலில் உள்ளவர்களை கலந்தாலோசித்து தொழில் பாதிக்காத வகையில் சட்டத்தைக் கொண்டு வர வேண்டும். ஆனால் பெரு நிறுவனங்களுக்கு சாதகமாக இச்சட்டம் உள்ளது எனக் குற்றம்சாட்டுகிறார் லாரி கூண்டு கட்டும் தொழில் கூடத்தின் உரிமையாளரான சேகர்.

மற்றொரு உரிமையாளரான தியாகராஜன், ”இந்தப் புதிய மோட்டார் வாகன சட்டத்தால் இரண்டு லட்சம் தொழிலாளர்கள் வேலையிழக்கும் நிலை ஏற்படும். கூண்டு கட்டுவதற்கான தரச் சான்று பெறவே 40 லட்சங்கள் செலவாகும். எனவே சிறிய அளவில் தொழில் செய்வோர் இதனைப் பெற முடியாமல் தொழிலை விட்டே வெளியேற வேண்டிய நிலை ஏற்படும். எனவே இத்தொழிலைக் காக்க மத்திய, மாநில அரசுகள் உடனடியாக நடவடிக்கை எடுக்க வேண்டும்” என வேதனையோடு தெரிவித்தார்.

இதையும் படிங்க: