நாமக்கல் மாவட்டம், பரமத்திவேலூர் தாலுகாவில் ரூ. 87 லட்சம் மதிப்பில் கட்டப்பட்டுள்ள அங்கன்வாடி மையம், தொடக்க வேளாண்மை கூட்டுறவு கடன் சங்கம், சத்துணவு மையம், மகளிர் சுகாதார வளாகம் மற்றும் பால் உற்பத்தியாளர்கள் கூட்டுறவு சங்க கட்டடம் உள்ளிட்டவற்றை அமைச்சர் தங்கமணி திறந்து வைத்தார்.
பின்னர் செய்தியாளர்களிடம் அவர் பேசுகையில், ’நாங்குநேரி மற்றும் விக்கிரவாண்டி சட்டப்பேரவை இடைத்தேர்தலில் அதிமுக 30 ஆயிரம் வாக்குகள் வித்தியாசத்தில் அமோக வெற்றி பெறும் என்றார். அப்போது இடைத்தேர்தலில் அமமுக மற்றும் மக்கள் நீதி மய்யம் போட்டியிடாதது குறித்து செய்தியாளர்கள் கேட்ட கேள்விக்கு, இடைத்தேர்தலில் அமமுக மற்றும் மக்கள்நீதி மய்யம் போட்டியிடாதது பயத்தை காட்டுகிறது.
ஆனால் அதிமுக எந்த தேர்தல் வந்தாலும் பெருவாரியான வாக்குகள் வித்தியாசத்தில் வெற்றி பெறும் என்று பதிலளித்தார். மேலும் பேசிய அவர், கடந்த மூன்று ஆண்டுகளில் தக்கல் முறையில் 40 ஆயிரம் மின் இணைப்புகள் வழங்கப்பட்டுள்ளன. மீதமுள்ள ஐந்தாயிரம் மின் இணைப்புகள் அக்டோபர் 1ஆம் தேதி முதல் உரிய கட்டணம் செலுத்துபவர்களுக்கு மூப்பு அடிப்படையில் மின் இணைப்பு வழங்கப்படும் என்றார். நாங்குநேரி தொகுதியில் பாஜக போட்டியிட விருப்பம் தெரிவித்துள்ளது தொடர்பாக எழுப்பிய கேள்விக்கு, பதில் ஏதும் கூறாமல் அங்கிருந்து சென்றார்.
