நாமக்கல் மாவட்டம் திருச்செங்கோடு அடுத்த எளையாம்பாளையத்தில் உள்ள தனியார் பொறியியல் கல்லூரியில் நடைபெற்ற பட்டமளிப்பு விழாவில் அண்ணா பல்கலைக்கழக துணைவேந்தர் டாக்டர். சூரப்பா கலந்துகொண்டு 974 மாணவிகளுக்கு பட்டங்களை வழங்கினார்.
பின்னர் பேசிய அவர், 'தமிழ்நாடு அரசு பெண் கல்விக்கு முக்கியத்துவம் அளித்து வருகிறது. இந்திய அளவில் தமிழ்நாட்டைச் சேர்ந்த பெண்கள் உயர்கல்வி பயின்று வருகின்றார். நாட்டின் வளர்ச்சியில் பெண்கள் பெரும் பங்கு வகிக்கின்றனர். ஐரோப்பிய நாடுகளை ஒப்பிடுகையில், இந்தியாவில் உயர் கல்வி, ஆராய்ச்சி படிப்பில் ஈடுபடுவோர்களின் சதவீதம் குறைவாக உள்ளது. இதனை மாற்ற அதிகளவு மாணவர்கள் உயர்கல்வி படிப்பதோடு, ஆராய்ச்சி படிப்பிலும் ஈடுபட வேண்டும். படித்தவுடன் வேலை கிடைக்கவில்லை என இளம் தலைமுறையினர் மனம் தளரக்கூடாது, அவர்கள் தங்களது திறமைகளை மேம்படுத்திக்கொண்டால் நிச்சயம் வேலை கிடைக்கும்.
தொடர்ந்து பேசிய அவர், ‘படித்த அனைவரும் வேலைக்கு செல்பவர்களாக இல்லாமல் தொழில் முனைவோர்களாக மாறி பலருக்கு வேலை தருபவர்களாக மாற வேண்டும். அரசும் இதற்கு பலவகைகளில் உதவி செய்வதோடு, இளம் தொழில் முனைவோர்களுக்கு அதிகளவு தொழில்நுட்ப உதவிகள், கடனுதவிகளை வழங்கி வருகிறது. அதனை பயன்படுத்திக்கொள்ள வேண்டும். கடந்த 20 வருடங்களில் இணைய வசதி உலக அளவில் பல்வேறு மாற்றங்களையும், வளர்ச்சியையும் ஏற்படுத்தி உள்ளதாகவும், இன்னும் பல மாற்றங்களையும் வருங்காலங்களில் தொடர்ந்து உருவாக்கும்' என பேசினார்.
