நாகப்பட்டினம் மாவட்டம் வேளாங்கண்ணியில் கீழ்த்திசை நாடுகளின் லூர்து நகரம் என்று போற்றப்படும், புனித ஆரோக்கிய அன்னை பேராலயம் உள்ளது. உலக சிறப்பு வாய்ந்த கோயிலுக்கு உள்ளூர் மட்டுமின்றி வெளி மாநிலம் மற்றும் வெளிநாடுகளில் இருந்தும் அதிகளவிலான பக்தர்கள் வந்து பிரார்த்தனை செய்கின்றனர். தமிழ்நாட்டின் பிரதான சுற்றுத் தலங்களில் ஒன்றாகவும், இந்த வேளாங்கண்ணி ஆரோக்கிய அன்னை ஆலயம் திகழ்கிறது.
இந்த ஆலயததின் ஆண்டு நவநாள் பெருவிழா கடந்த 29 ஆம் தேதி கொடியேற்றத்துடன் துவங்கி நடைபெற்று வருகிறது. தற்போது இவ்விழாவின் முக்கிய பெருவிழாவான பெரிய சப்பர பவனி எனப்படும், தேர் திருவிழா நேற்று (செப். 7) இரவு நடைபெற்றது. முன்னதாக தஞ்சை மறைமாவட்ட பரிபாலகர் சகாயராஜ் தலைமையில், நவநாள் திருப்பலிகள், மாதா மன்றாட்டு, கூட்டு பிராத்தனை அதை தொடர்ந்து திருப்பலி உள்ளிட்ட நிகழ்வுகள் நடைபெற்றன.
அதனைத் தொடர்ந்து தேர் புனிதம் செய்யப்பட்டு கடற்கரை சாலை, ஆரியநாட்டு தெரு உத்திரியமாதா தெரு, என கடைவீதி வழியாக மின் விளக்குகளால் அலங்கரிக்கப்பட்ட சப்பரத்தில் மிக்கேல் அதிதூதர், செபஸ்தியார், சூசையப்பர், உத்திரிய மாதா, ஆரோக்கிய மாதா ஆகிய 7 தேர்களில் தனியாக காட்சி அளித்தனர்.
இதில் மாநிலத்தின் பல்வேறு பகுதிகளில் இருந்தும் வெளிநாடுகளில் இருந்தும் பல்லாயிரக்கணக்கான பக்தர்கள் கலந்து கொண்டு சிறப்பு ஆராதனை செய்தனர். ஆரோக்கிய மாதாவின் பிறந்த நாள் விழா இன்று காலை 6 மணிக்கு விண்மீன் ஆலயத்தில் சிறப்பு திருப்பலியுடன் நடைபெற்றது.
அதனைத் தொடர்ந்து மாலை 6 மணிக்கு கொடி இறக்கத்துடன் விழா நிறைவு பெறுகிறது. மாதா பிறந்த நாளான (செப்.8) இன்று உள்ளூர் விடுமுறை அறிவித்து மாவட்ட ஆட்சியர் ஜானி டாம் வர்கீல் உத்தரவிட்டு உள்ளார். வேளாங்கண்ணியில் முதல் முறையாக மும்மத பிரார்த்தனைக் கூட்டம் நடைபெற்றது.
தஞ்சை மறைமாவட்ட ஆயார் தேவதாஸ் அம்புரோஸ் தலைமையில் தஞ்சை மறைமாவட்ட பரிபாலகர் சகாயராஜ், நாகூர் தர்கா மேனேஜிங் டிரஸ்டி செய்யது முகம்மது ஹாஜி, உசேன் சாகிப், நாகூர் தர்கா பரம்பரை கலிபா மஸ்தான்சாகிப், வேளாங்கண்ணி ரஜதகிரீஸ்வர் கோயில் தலைமை குருக்கள் நீலகண்டன் ஆகியோர் கலந்து கொண்டு உலக நன்மைக்காக மும்மத பிரார்த்தனை செய்தனர்.
இதையும் படிங்க: வேளாங்கண்ணியில் தேர் பவனி திருவிழா -பல்லாயிரக்கணக்கான பக்தர்கள் பங்கேற்பு
