மயிலாடுதுறை: தரங்கம்பாடி தாலுக்கா, கோவாஞ்சேரி கிராமத்தைச் சேர்ந்த ஆர்த்திகா என்ற மாணவி உக்ரைன் நாட்டில் மருத்துவம் படித்து வருகிறார். சமீபத்தில் உக்ரைன் மீது ரஷ்யா போர் தொடுத்த நிலையில், ஒன்றிய, மாநில அரசுகள் மாணவர்களை விரைவாக மீட்க நடவடிக்கை எடுக்க செல்போன் மூலம் பெற்றோருக்குத் தகவல் தெரிவித்தனர். இதையடுத்து, ஆர்த்திகாவின் பெற்றோர் மயிலாடுதுறை மாவட்ட ஆட்சியர் மூலம் தமிழ்நாடு அரசின் கவனத்திற்குக் கொண்டு சென்றனர்.
மைனஸ் 2 டிகிரி குளிரில்...
ஒன்றிய, மாநில அரசுகளின் முயற்சியில் ஆர்த்திகா இன்று மயிலாடுதுறை மாவட்டம் தரங்கம்பாடி தாலுக்கா கோவாஞ்சேரியில் உள்ள அவரது வீட்டிற்கு பாதுகாப்பாக வந்தடைந்தார். அவரை பூம்புகார் எம்.எல்.ஏ. நிவேதாமுருகன், மாவட்ட ஊராட்சிக்குழுத் தலைவர் உமாமகேஸ்வரி சங்கர், முன்னாள் எம்எல்ஏ அருட்செல்வன் ஆகியோர் சால்வை அணிவித்து வரவேற்றனர்.
இதுகுறித்து மாணவி ஆர்த்திகா கூறுகையில், ”கார்கிவ்விலிருந்து போலந்து பார்டருக்கு வருவதற்கு மிகவும் சிரமப்பட்டோம். டிரான்ஸ்போர்ட் வசதி இல்லாததால் மாணவர்கள் அனைவரும் ஒன்றிணைந்து தங்களிடம் இருந்த பணத்தைக்கொண்டு தனியார் வாகனத்தில் சென்றாலும் எல்லைவரை இந்தியர்களை அவர்கள் கொண்டுவிடவில்லை.
பல கி.மீ தூரத்திற்கு முன்பாக இறக்கி விட்டுவிட்டனர். இரவு நேரத்தில் செல்போன் வெளிச்சத்தில் பல கி.மீ தூரம் மைனஸ் 2 டிகிரி குளிரில் நடந்து சென்றோம். உக்ரைனை விட்டு போலந்து எல்லைக்குச் சென்றபிறகு எந்த பிரச்னையும் இல்லை. இந்தியன் எம்பசியில் நன்றாக கவனித்துக்கொண்டனர். உக்ரைன் எல்லையை கடப்பது மிகவும் சிரமாக உள்ளது. அதற்கு ஏதாவது உதவி செய்தால் இந்தியவர்கள் வெளியேறுவதற்கு வசதியாக இருக்கும், என்னுடன் நூறு மாணவர்கள் வந்தார்கள். விமானம் மூலம் டில்லி வந்து தமிழ்நாடு இல்லத்தில் தங்கவைக்கப்பட்டோம். அங்கேயும் தமிழ்நாடு அரசு நன்றாக கவனித்துக்கொண்டது.
நடவடிக்கை
ஒன்றிய, மாநில அரசுகளின் முயற்சியால் நல்லமுறையில் வீட்டிற்கு வந்து சேர்ந்தேன். என்னைப்போன்று இன்னும் சிக்கித் தவிக்கும் இந்திய மாணவர்களை விரைவாக மீட்க ஒன்றிய, மாநில அரசுகள் நடவடிக்கை எடுக்க வேண்டும். மருத்துவம் இறுதியாண்டு படிக்கிறேன். இந்தியாவிலேயே எனது படிப்பை தொடர மத்திய மாநில அரசுகள் நடவடிக்கை எடுக்க வேண்டும்” என்றார்.
இதையும் படிங்க:உக்ரைனிலிருந்து வெளியேற இந்திய டாக்டரின் நிபந்தனை - ஆடிப்போன அதிகாரிகள்
