'மீன்பிடித் தடைக்கால மானியத் தொகை வழங்க வேண்டும்' - மீனவர்கள் கோரிக்கை

நாகை: தடைக்காலத்தில் மீன் பிடித் தொழில் வருவாய் போதியளவு இல்லாததால், தமிழக அரசு வங்கி கடன் மற்றும் மானியத் தொகை வழங்க வேண்டும் என்று மீனவர்கள் கோரிக்கை விடுத்துள்ளனர்.

கிழக்கு கடற்கரையில் மீன்களின் இனப் பெருக்க காலமான ஏப்ரல் 15 முதல் ஜூன் 13 வரையில் 60 நாட்கள் மீன் பிடித் தடைக் காலமாக அரசு அறிவித்துள்ளது. இந்த காலங்களில் 6 குதிரைத்திறனுக்கு மேல் உள்ள மோட்டார் இன்ஜின்கள் பொருத்திய படகுகள் மற்றும் இழுவை வலைகளை பயன்படுத்த மீனவர்களுக்கு தடை விதிக்கப்பட்டுள்ளது.

சூடிபிடித்துள்ள பழுது பார்க்கும் பணி:

நாகை மாவட்டத்தை பொறுத்தவரையில் கொள்ளிடம் முதல் கோடியக்கரை வரையிலான 60க்கும் மேற்பட்ட மீனவ கிராமங்கள் உள்ளன. தற்போது தடை காலத்தில் மீன்பிடி தொழிலில் ஈடுபடாமல் படகுளை பழுது நீக்கும் பணியிலும் பராமரிப்பு பணிகளிலும் மீனவர்கள் ஈடுபட்டுள்ளனர். இதன் காரணமாக நாகை தோணித்துறை பகுதியில் இன்ஜின் பழுது நீக்கம் படகு சீரமைத்தல், வலைகள் மற்றும் மீன்பிடி சாதனைங்களை பழுது நீக்கம் செய்தல், படகுகளில் கடைசல் மற்றும் தச்சு வேலைபாடுகள், கிரீஸ் பூசூதல், வர்ணம் அடித்தல் போன்ற பணிகள் வேகமாக நடைபெற்று வருகின்றன. இப்பணியில் நூற்றக்கணக்கான தொழிலாளர்கள் இரவு பகலாக ஈடுபட்டு வருகின்றனர்.

மீனவர்களின் கோரிக்கை:

இது குறித்து மீனவர் தரப்பிலிருந்து, ஒரு படகினை பழுது நீக்கி மராமத்து பணிகள் மேற்கொள்ள குறைந்தது பத்து நாட்களாகும். படகு ஒன்றிற்கு 3 லட்சத்தில் இருந்து 5 லட்சம் ரூபாய் வரை செலவாவதாக கூறுகின்றனர். கடந்த சில ஆண்டுகளாக மீன் பிடித் தொழில் வருவாய் போதியளவு இல்லை எனவும், சில மாதங்களுக்கு முன் ஏற்பட்ட கஜா புயலில் பாதிப்பினாலும் கடன் வாங்கி பணிகளை மேற்கொண்டு வருவதாக தெரிவிக்கின்றனர்.

எனவே, புதுச்சேரி அரசு மீனவர்களுக்கு மானியம் வழங்குவது போன்று தமிழக அரசும் வங்கி கடன் மற்றும் மானிய தொகை வழங்க வேண்டும் என மீனவர்கள் கோரிக்கை விடுத்துள்ளனர். இதுபோன்று தற்போது மீன் பிடி தடை காலத்தை ஏப்ரல், மே மாதத்திலிருந்து இயற்கை சீற்றம் அதிகம் ஏற்படக்கூடிய நவம்பர், டிசம்பர் மாதங்களில் மாற்றித் தர அரசு நடவடிக்கை எடுக்க வேண்டும் எனவும் அவர்கள் அரசுக்கு கோரிக்கை வைக்கின்றனர்.