மக்களின் உயிர் மீது அக்கறை இல்லாதவர் கமல் - அமைச்சர் ஓ.எஸ்.மணியன்!

மக்களின் உயிர் மீது அக்கறை இல்லாதவர் கமல்ஹாசன் என்று திருக்கடையூர் அரசு விதைப்பண்ணை அலுவலகம் கட்டடத்தை திறந்து வைக்கும் நிகழ்ச்சியில் அமைச்சர் ஓ.எஸ்.மணியன் தெரிவித்துள்ளார்.

நாகப்பட்டினம்: மயிலாடுதுறையில் அரசு விதைப்பண்ணை அலுவலக கட்டடத்தை அமைச்சர் ஓ.எஸ்.மணியன் இன்று(அக் .3) திறந்து வைத்தார்.

மயிலாடுதுறை மாவட்டம் திருக்கடையூரில் ரூ.12 லட்சம் மதிப்பிலான அரசு விதைப்பண்ணை அலுவலக கட்டட திறப்பு விழா நிகழ்ச்சி இன்று (அக்.3) நடைபெற்றது.

மாவட்ட ஆட்சியர் தலைமையில் நடைபெற்ற இந்நிகழ்ச்சியில் கைத்தறி, துணிநூல் அமைச்சர் ஓ.எஸ்.மணியன் கட்டத்தை திறந்து வைத்து அதிக மகசூல் தரும் வகையில் உருவாக்கப்பட்டுள்ள குழி நாற்று நடவு முறையை பார்வையிட்டார்.

அப்போது செய்தியாளர்களிடம் அமைச்சர் ஓ.எஸ்.மணியன் கூறுகையில், “இந்தப் பருவத்துக்கான நெல் கொள்முதல் நிலையம் இன்று(அக்.3) அல்லது நாளை(அக்.4) தொடங்கப்படும்.

கடந்த ஆண்டை விட தற்போது நெல் குவிண்டாலுக்கு ரூ.53 அதிகமாக முதலமைச்சர் அறிவித்துள்ளார். எனவே, மோட்டோ ரக நெல் குறைந்தபட்சம் கிலோ ரூபாய் 19.18 க்கு கொள்முதல் செய்யப்படுகிறது.

இந்த ஆண்டு 149 நெல் கொள்முதல் நிலையங்கள் திறக்கப்பட்டன. ஏற்கனவே உள்ள அனைத்து கொள்முதல் நிலையங்களும் இந்த ஆண்டும் செயல்படும், தேவைப்பட்டால் விவசாயிகளின் தேவைக்கேற்ப கூடுதல் கொள்முதல் நிலையங்கள் திறக்கப்படும்.