நாகப்பட்டினம்: தடை செய்யப்பட்ட வலைகளைப் பயன்படுத்தி பிடிக்கப்பட்ட மீன்கள் வெளிமாநிலங்களுக்கு ஏற்றுமதி செய்யப்படுவதாக காவல் துறையினருக்கு ரகசியத் தகவல் கிடைத்துள்ளது.
நாகை மாவட்டத்தில், கரோனா அச்சுறுத்தல் காரணமாக, மூன்று மாத காலமாக கடலுக்கு மீன்பிடிக்கச் செல்லாமல் இருந்த மீனவர்கள், சில நாட்களுக்கு முன்பிலிருந்து மீன்பிடிக்கச் சென்று வருகின்றனர். இச்சூழலில் தமிழ்நாடு அரசால் தடை செய்யப்பட்ட இரட்டை மடி வலைகள், சுருக்குமடி வலைகளைப் பயன்படுத்தி கடலில் மீன்பிடித்து வரும் மீனவர்கள் மீது கடுமையான நடவடிக்கை மீன்வளத்துறை சார்பாக எடுக்கப்பட்டு வருகிறது.
அதனைத் தொடர்ந்து, அரசால் தடை செய்யப்பட்ட வலைகளைப் பயன்படுத்தி மீன்பிடித்து, அந்த மீன்களை கேரளா உள்ளிட்ட வெளி மாநிலங்களுக்கு வாகனங்கள் மூலம் ஏற்றுமதி செய்ய இருப்பதாக மீன்வளத்துறை அலுவலர்களுக்கு ரகசியத் தகவல் கிடைத்துள்ளது. இதனையடுத்து சோதனைச் சாவடிகளில் நாகப்பட்டினம் மாவட்ட காவல் துணைக் கண்காணிப்பாளர் முருகவேல் தலைமையில் காவலர்கள் குவிக்கப்பட்டு, மீன்வளத்துறை அலுவலர்கள் அவ்வழியே மீன் ஏற்றிச்சென்ற வாகனங்களை மறித்து சோதனை செய்தனர்.
நடுக்கடலில் மீனவர்கள் மீது தாக்குதல்... 7 பேர் காயம்!
குளிரூட்டப்பட்ட கன்டெய்னர் வாகனங்களை மறித்து காவல் துறையினர் மீன்களை ஆய்வு செய்து எந்த வகையில் பிடிக்கப்பட்ட மீன்கள் என்பதை உறுதி செய்து, வாகனங்களை அனுப்பி வைத்தனர். மேலும், அரசால் தடை செய்யப்பட்ட வலைகளைப் பயன்படுத்தி மீன்பிடித்தால் கடும் நடவடிக்கை எடுக்கப்படும் என்று மீன்வளத்துறை அலுவலர்கள் எச்சரிக்கை விடுத்துள்ளனர்.
இதேபோல நாகை மாவட்டத்தில் காணூர், கொள்ளிடம் உள்ளிட்ட மாவட்ட எல்லைகளில் காவல் துறையினர் சோதனையில் ஈடுபட்டுள்ளனர்.
