நாகை மாவட்டம் மயிலாடுதுறை அருகே காலகஸ்திநாதபுரம் கிராமத்தில் கெயில் நிறுவனம் எரிவாயு குழாய் பதிக்கும் பணி நடைபெற்று வருகிறது. மாகாணத்திலிருந்து மேமாத்தூர் வரை எரிவாயு கொண்டு செல்லும் குழாய்களை இணைப்பதற்கான பணிகள் நடைபெற்று வருகிறது. நாங்கூர், காத்திருப்பு, தலச்சங்காடு, காளகஸ்திநாதபுரம் வழியாக மேமாத்தூர் வரை 29 கிலோமீட்டர் தூரம் வரை எரிவாயு கொண்டு செல்லும் குழாய்கள் பதிக்கப்பட்டு வருகிறது.
இதற்காக காலகஸ்தினாதபுரத்தில் ராட்சச குழாய்கள் இறக்கப்பட்டு விவசாய நிலங்களில் அழிக்கப்பட்டு வருகிறது. பயிரிடுவதற்காக நடவு செய்யப்பட்ட பயிர்களை அப்புறப்படுத்திவிட்டு காவல்துறையினரின் துணையுடன் பணிகள் மேற்கொள்ளப்பட்டு வருகிறது. ஹைட்ரோகார்பன் ஷெல் கேஸ் எடுப்பதற்காகவே இந்தக் குழாய்கள் பதிக்கப்பட்டு வருவதாகவும், இதை தமிழக அரசு கண்டுகொள்ளாமல் இருப்பதாகவும் விவசாயிகள் குற்றம்சாட்டி வருகின்றனர்.
மேலும், நிலங்களை பாழ்படுத்தி கெயில் நிறுவனம் செய்யும் வேலைகளை தடுத்து நிறுத்த வேண்டும் என்றும் செம்பனார்கோவில் காவல் நிலையத்தில் விவசாயிகள் புகார் அளித்துள்ளனர்.
