டீக்கடையில்அதிகாரிகள் ஆய்வு.. சீல் வைப்பதை தடுத்த திமுக பிரமுகர்.. மயிலாடுதுறையில் நடந்தது என்ன?

மயிலாடுதுறையில் டீக்கடை மற்றும் பழக்கடையில் உணவு பாதுகாப்புத்துறை சோதனையின் போது ஏற்பட்ட வாக்குவாதத்தால் அதிகாரிகள் எந்தவித நடவடிக்கையும் எடுக்காமல் திரும்பி சென்றுள்ளனர்.

மயிலாடுதுறை: மயிலாடுதுறை நகரில் சிறிய டீக்கடை முதல் பிரபல ஹோட்டல் வரை சுகாதாரமற்ற முறையில் இயங்குவது தொடர் கதையாக நீடித்து வருவதாக குற்றச்சாட்டு உள்ளது. இதனிடையே சின்ன கடை வீதியில் பிரபலமான குரு டீக்கடையில் சுகாதாரமற்ற முறையில் உணவுகள் தயாரிப்பதாக நகராட்சி உணவு பாதுகாப்பு துறைக்கு புகார் வந்து உள்ளது. அந்தப் புகாரின் அடிப்படையில் இன்று நகராட்சி உணவு பாதுகாப்புத் துறை அலுவலர் சீனிவாசன் தலைமையில் நகராட்சி சுகாதாரத் துறையினர் திடீர் சோதனை மேற்கொண்டனர்.

சோதனையில், பஜ்ஜி போண்டா உள்ளிட்ட உணவு பண்டங்களை தயாரிக்க பயன்படுத்தப்பட்ட எண்ணெயை மீண்டும் மீண்டும் பயன்படுத்தியது தெரிவ வந்தது. மேலும் எண்ணெய் மிகுந்த உணவு பண்டங்களை செய்தித்தாளில் வைத்து கொடுத்ததால் நகராட்சித் துறை அதிகாரிகள் கடையை பூட்டி சீல் வைப்பதாக கூறி உள்ளனர்.

அப்போது அங்கு வந்த புளியந்தெருவைச் சேர்ந்த திமுக பிரமுகர் அமர்நாத் என்பவர் டீக்கடைக்கு ஆதரவாக அதிகாரிகளிடம் வாக்கு வாதத்தில் ஈடுபட்டு உள்ளார். அப்போது அமர்நாத் ஒரு மணி நேரத்திற்கு முன்பாக மாமுல் கேட்டதற்கு கொடுக்காததால் கடையை பூட்டி சீல் வைக்கிறீர்களா என்றும் சுகாதாரமற்ற முறையில் எத்தனையோ கடைகள் உள்ளது அங்கெல்லாம் நடவடிக்கை எடுப்பதில்லை என்றும் கடையை பூட்டக்கூடாது என்று கூறி நடவடிக்கை எடுக்கவிடாமல் தடுத்து வாக்குவாதத்தில் ஈடுபட்டார்.

பின், எதிரே இருந்த பழக்கடைக்கு சென்று சோதனை செய்து உள்ளனர். உணவு பாதுகாப்பு துறையின் சோதனையில் மாம்பழங்கள் ஆதலால் கடையை சீல் வைக்க உணவு பாதுகாப்புத்துறை அலுவலர் சீனிவாசன் உத்தரவிட்டார். நகராட்சி துறையினர் கடைக்கு சீல் வைக்க முற்பட்டபோது அங்கு திரண்ட பொதுமக்கள் எதிரே உள்ள டீக்கடையை சீல் வைக்காமல் ஏன் இந்த கடையை மட்டும் சீல் வைக்கிறீர்கள் என்று கடை நிர்வாகி உட்பட பொதுமக்கள் வாக்குவாதத்தில் ஈடுபட்டு உள்ளனர்.

நகராட்சி அதிகாரிகளால் பூட்டப்பட்ட கடைக்கு சீல் வைக்கவிடாமல் தடுத்தனர். சுகாதாரமற்ற முறையில் உள்ள கடைகள் மீது நடவடிக்கை எடுக்க வேண்டும் என்றும், சமீபத்தில் உயர்தர சைவ உணவகமான காளியாகுடி ஹோட்டலில் கரப்பான் பூச்சி கிடந்தும் அந்த உணவகத்தின் மீது நடவடிக்கை எடுக்காமல் லஞ்சம் பெறுவதாக பொது மக்கள் குற்றம் சாட்டினர்.

இச்சம்பவம் குறித்து அறிந்து வந்த போலீசார் பொது மக்களிடையே பேச்சுவார்த்தை நடத்தி உள்ளனர். அப்போது அங்கு வந்த திமுக நகராட்சி நகர்மன்ற தலைவர் செல்வராஜ் யார் கடையை பூட்டி சீல் வைக்க சொன்னது என்று கூறியுள்ளார். அப்போது அதிகாரிகளை நடவடிக்கை எடுக்காமல் தடுக்க நீங்கள் யார் என்று பொதுமக்கள் வாக்குவாதத்தில் ஈடுபட்டு உள்ளனர்.

இதனால் நகராட்சி நகர்மன்ற தலைவர் செல்வராஜ் ஆதரவாளர்களுக்கும், பொது மக்களுக்கும் இடையே தள்ளுமுள்ளு ஏற்பட்டது. உடனே செயல்பட்ட போலீசார் கூட்டத்தை கலைத்தனர். இதன் காரணமாக நடவடிக்கை எடுக்க முடியாமல் நகராட்சி உணவு பாதுகாப்புத்துறை அலுவலர் சீனிவாசன் திரும்பி சென்றார். அரசு அதிகாரிகளை பணி செய்யவிடாமல் நகராட்சி திமுக நகரமன்ற தலைவர் செல்வராஜ் தடுத்தது பொதுமக்களிடையே அதிருப்தியை ஏற்படுத்தி உள்ளது.

மேலும், பாரபட்சமின்றி உணவு பாதுகாப்பு துறை அதிகாரிகள் நடவடிக்கை எடுக்க வேண்டும் என்றும் பொதுமக்கள் கோரிக்கை விடுத்துள்ளனர். இரவு நேரத்தில் பிரதானமான சின்னக்கடை வீதியில் நடைபெற்ற இந்த போராட்டம் காரணமாக பெரும் பரபரப்பை ஏற்படுத்தி உள்ளது.

இதையும் படிங்க: புகையிலை விற்பனையில் பள்ளி மாணவர்களை டார்கெட் செய்யும் கும்பல்: கமிஷனர் அதிரடி நடவடிக்கை!