மதுரை: 'அழிவிலிருந்து ஆசியக் கழுகுகளை காக்கும்' சேவ் (Saving Asia's Vultures from Extinction) என்ற அமைப்பின் சார்பாக கடந்த மார்ச் மாதம் 9 ஆம் தேதி நேபாள நாட்டின் நவல்பூரில் நடைபெற்றது. உலகம் முழுவதும் பல்வேறு நாடுகளிலிருந்து பங்கேற்ற இந்த கலந்துரையாடல் கூட்டத்தில் தென்னிந்தியாவிலிருந்து கோவை அருளகம் அமைப்பின் சார்பாக தமிழக காட்டுயிர் வாரிய உறுப்பினரும், பாறு கழுகுகள் பாதுகாப்புக்குழு உறுப்பினருமான சு.பாரதிதாசன் கலந்து கொண்டார்.
ஈடிவி பாரத் தமிழ்நாடு ஊடகத்திற்கு அவர் அளித்த சிறப்பு நேர்காணலில்,"பாறு கழுகுகள் என சங்க இலக்கியங்களிலும், பழங்குடி மக்களாலும் வழங்கப்பட்டு வரும் பிணந்தின்னிக் கழுகுகள் தற்போது பேரழிவு அபாயத்தில் சிக்கியுள்ளன. அவற்றை அழிவிலிருந்து மீட்பதற்காக என்ற அமைப்பு செயல்பட்டு வருகிறது. இதில் அருளகமும் இணைந்து செயலாற்றி வருகிறது. ஒவ்வோராண்டும் பாறு கழுகுகளை காப்பாற்றுவது குறித்த கலந்துரையாடல் கூட்டம் வெவ்வேறு நாடுகளில் நடைபெறுவது வழக்கம். இந்த முறை நேபாளத்தின் தலைவர் காத்மண்டில் 12 ஆவது கலந்துரையாடல் கூட்டம் நடைபெற்றது.
அதன் தொடர்ச்சியாக அங்குள்ள சித்பவன் தேசிய பூங்காவிலும் நடைபெற்றது. இதில் இந்தியாவின் அருகமை நாடுகளான, சிங்கப்பூர், பங்களாதேஷ், பாகிஸ்தான் ஆகியவற்றோடு இங்கிலாந்து, அமெரிக்கா உள்ளிட்ட நாடுகளிலிருந்து 45-க்கும் மேற்பட்ட பிரதிநிதிகள் கலந்து கொண்டனர். இதில் தென்னிந்தியாவிலிருந்து அருளகமும், சலீம்அலி பறவையியல் ஆய்வு மையமும் மட்டுமே கலந்து கொண்டன. இக்கலந்துரையாடலில் அருளகம் சார்பாக என்னையும் பேச அழைத்திருந்தனர்.
கழுகுகளைக் கொல்லும் மருந்துகள்: கழுகுகளுக்கு கேடு பயக்கும் மருந்துகள் என அறிவியலாளர்களால் பரிந்துரைக்கப்பட்ட கீட்டோபுருஃபென், ஃப்லுநிக்ஸின் மருந்துகள் தமிழ்நாட்டு அரசின் கால்நடை மருத்துவத்துறையிலிருந்து விலக்கப்பட்டு, தற்போது பாதுகாப்பான மாற்று மருந்துகள் மட்டுமே தமிழ்நாடு அரசால் வழங்கப்பட்டு வருகிறது. இந்தக் கொள்கை முடிவு ஏற்படுவதற்கான முக்கியக் காரணி, அருளகம் பாறு கழுகுகளின் இறப்பு குறித்து மேற்கொண்ட களப்பணிகள்தான். இதன் அடிப்படையில் நேபாள கலந்துரையாடலில் என்னையும் பேச அழைத்திருந்தனர். இந்த அனுபவங்கள் அனைத்தையும் நான் அங்கு பகிர்ந்து கொண்டேன். மேலும் பல்வேறு நாடுகளில் பாறு கழுகுகளைப் பாதுகாப்பதற்காக நடைபெற்றும் வரும் செயல்பாடுகள் குறித்தும் அறிந்து கொள்ள வாய்ப்பு ஏற்பட்டது.
ஜிபிஎஸ் கருவி: பாறு கழுகு மிக இயல்பாக 200 கி.மீ. தூரம் வரை பறந்து சென்று திரும்பக்கூடிய ஆற்றல் படைத்ததாகும். இதற்காக அனைத்து நாடுகளிலும் ஜிபிஎஸ் பொருத்தி ஆய்வுகள் பல மேற்கொள்ளப்பட்டு வருகின்றன. இதன் மூலம் நேபாள நாட்டில் விடப்பட்ட பாறு கழுகு ஒன்று, பாகிஸ்தான் எல்லைப்புறம் வரை பறந்து சென்று திரும்பியதை நாங்கள் உணர்ந்தோம். இதேபோன்று தமிழகத்திலும் இப்பறவைகள் எங்கு இரை தேடச் செல்கின்றன என்பது குறித்த விபரங்களை அறிய ஜிபிஎஸ் பயன்படுத்தும் முறையை மேற்கொள்ள வேண்டும் என விரும்புகிறோம்.
பாறுகழுகுகளுக்கான இரை: தற்போது விரல்விட்டு எண்ணக்கூடிய அளவிலே இருக்கக்கூடிய பாறு கழுகுகளை பாதுகாக்க, அவற்றிற்கு உரிய பாதுகாப்பான இரை கிடைக்கச் செய்வதும் மிக அவசியம். சிற்றூர்களுக்கு அருகே உள்ள காடுகளில் வனவிலங்குகள் இறக்க நேரிட்டால், நாற்றமடிக்கிறது என்பதற்காகவும், தொற்று நோய் பரவும் அபாயம் உள்ளது என்பதாலும் இறந்த விலங்குகளை புதைக்கவோ, எரிக்கவோ செய்கின்றனர்.
அதேபோன்று கால்நடைகள் இறந்தாலும் சுகாதாரத்துறை வலுக்கட்டாயமாக அவற்றைப் புதைக்க வலியுறுத்துகிறது. இறந்த விலங்குகளை நம்பியே வாழ்ந்து வரும் பாறு கழுகுகள் உள்ளிட்ட சில விலங்குகள் மற்றும் பறவைகள் பாதிப்பிற்கு ஆளாகின்றன. ஆகையால் இறந்த விலங்குகளை இதுபோன்ற பறவைகளும் விலங்குகளும் உண்பதற்கு ஏதுவாக அவற்றை காட்டுக்குள் ஓரிடத்தில் சென்று போடுவதற்கு தமிழக அரசு வழிவகை செய்ய வேண்டும். தற்போது தமிழக வனத்துறை சீரிய பங்காற்றி வரும் இந்த சூழலில் இதனையும் கவனத்திற் கொள்ள வேண்டும்.
கூட்டம் கூட்டமாக இறக்கும் கழுகுகள்: நேபாளத்தில் நடைபெற்ற கலந்துரையாடல் கூட்டத்தில் பல்வேறு தீர்மானங்கள் முன்மொழியப்பட்டன. குறிப்பாக, பாறு கழுகுகளுக்கு கேடு பயக்கும் மருந்துகளை அறவே கிடைக்காமல் மத்திய அரசு தடை செய்ய வேண்டும். அத்துடன் அது தொடர்பான ஆய்வுகளை இந்திய கால்நடை ஆய்வு மையம் மேற்கொண்டு வருவதற்கும் பாராட்டு தெரிவிக்கப்பட்டது. அதன் முடிவுக்கேற்ப அரசு செயல்படுமேயானால், எஞ்சியுள்ள பறவைகளைக் காப்பாற்ற முடியும் எனவும் வலியுறுத்தப்பட்டது.
மனித தவறுகள் காரணமாக விஷம் வைத்துக் கொல்லப்படும் விலங்குகளை பாறு கழுகுகள் கூட்டம் கூட்டமாக உண்பதால் அவை இறப்பைத் தழுவ நேரிடுகின்றன. சில வாரங்களுக்கு முன்பு நேபாளத்திலும் பங்களாதேசத்திலும், தவிர அஸ்ஸாமிலும் இதே போன்று கூட்டம் கூட்டமாக பாறு கழுகுகள் இறந்தன. ஆகையால் இவற்றையெல்லாம் தவிர்ப்பதற்கான செயல்பாடுகள் குறித்து விரிவாக அலசி ஆராயப்பட்டன.
தரவுத்தளம் அவசியம்: அதேபோன்று இறக்க நேரிடும் பாறு கழுகுகள் குறித்து விரிவான பரிசோதனை மேற்கொள்வதும், அவை எதனால் இறக்க நேரிட்டன என்பது குறித்த உலகளாவிய தரவுத் தளம் உருவாக்கப்பட வேண்டும். காரணம், பெரும்பாலான பாறுகள் எதனால் இறக்கின்றன என்பது தெரிய வருவதேயில்லை. நாம் அவற்றை மூடி மறைக்காமல், வெளிப்படுத்தினால் அதற்குரிய சிக்கலைக் களைவதற்கு வாய்ப்பு ஏற்படும். தமிழகத்திலும், இந்தியாவிலும் ஒரு பறவை இறக்க நேர்ந்தால், அது எந்தப் பறவையாக இருந்தாலும் ஆய்வுக்கு உட்படுத்த வேண்டும் என்பதை எனது கோரிக்கையாக முன் வைக்கிறேன்” என்றார்.
இதையும் படிங்க: ஒகேனக்கலில் "பரிசல் ஓட்டிகள் பகல் கொள்ளை" என புகார்.. நடவடிக்கை எடுக்குமா மாவட்ட நிர்வாகம்!
