மதுரை சம்மட்டிபுரத்தை சேர்ந்த புஷ்பவள்ளி என்பவர் உயர் நீதிமன்ற மதுரைக் கிளையில் மனு ஒன்று தாக்கல் செய்திருந்தார். அதில் கடந்த 27. 06. 2017 அன்று தனது இரு காதுகளிலும் கடுமையான வலி ஏற்பட்டதால், மதுரை அரசு ராஜாஜி மருத்துவமனையில் சிகிச்சைக்காக சென்றேன். அங்கு என்னை பரிசோதித்த மருத்துவர்கள் எவ்வித பிரச்னையும் இல்லை எனக் கூறி வெறும் மருந்துகள் கொடுத்து அனுப்பிவைத்தனர்.
ஆனால் 11.07.2017இல் மீண்டும் கடுமையாக வலி ஏற்பட்டதால், தொடர்ந்து அதே மருத்துவமனைக்கு சென்றேன். அப்போது எனது வலது பக்க காதில் அறுவை சிகிச்சை செய்தனர். சிகிச்சைக்கு பின்னர் எனது வலது பக்க காதின் கேட்கும் திறன் முற்றிலுமாக குறைந்தது.
அதிலிருந்து ஒரு ஆண்டுக்கு பின் தனது இடது பக்க காதில் அதிக வலி ஏற்பட்டது. அப்போதும் அதே மருத்துவமனைக்கு சென்றேன், முன்னர்போலவே இடது பக்க காதின் கேட்கும் திறனும் முற்றிலுமாக குறைந்தது. இதனையடுத்து தனக்கு மேல் சிகிச்சையளிக்குமாறு மருத்துவர்களிடம் கேட்டேன். ஆனால் அவர்கள் தன்னை மருத்துவமனையிலிருந்து வலுக்கட்டாயமாக வெளியேற்றிவிட்டனர்.
தனக்கு மேல் சிகிச்சை அளிக்காததால், தற்போது நான் கேட்கும் திறன் இல்லாமலும், வலியோடும் வாழ்ந்து வருகிறேன். எனவே தவறான சிகிச்சை அளித்த மருத்துவர்கள் மீது நடவடிக்கை எடுப்பதுடன், தனது மருத்துவ குறைபாட்டிற்கு உரிய இழப்பீடு வழங்க உத்தரவிட வேண்டும் என அதில் தெரிவித்திருந்தார்.
இந்த மனுவின் மீதான விசாரணை உயர் நீதிமன்ற மதுரைக் கிளை நீதிபதி கோவிந்தராஜ் முன்னிலையில் விசாரணைக்கு வந்தது. அப்போது நீதிபதி இதுகுறித்து, மருத்துவத்துறை இயக்குநர், மதுரை அரசு ராஜாஜி மருத்துவமனை முதல்வர் ஆகியோர் பதிலளிக்க உத்தரவிட்டு, வழக்கை நான்கு வாரங்களுக்கு ஒத்திவைத்தார்.
இதையும் படிங்க: காய்ச்சல் தடுப்பு நடவடிக்கைகள் சிறப்பாக செய்யப்படுகிறது - அமைச்சர் விஜயபாஸ்கர்
