ஒரு கையில் கபசுர குடிநீர், மறுகையில் மதுவா ? - உயர் நீதிமன்றம்

மதுரை : அரசு ஒரு கையில் நோய் எதிர்ப்பாற்றலை அதிகரிக்க கபசுர குடிநீரையும், மறுகையில் அதனைப் பாதிக்கும் மதுவையும் வைத்திருப்பது முரண்பாடாக உள்ளது என உயர் நீதிமன்ற மதுரைக்கிளை கருத்து தெரிவித்துள்ளது.

மதுரையைச் சேர்ந்த போனிபாஸ் உயர் நீதிமன்ற மதுரைக் கிளையில் பொதுநல வழக்கினைத் தாக்கல் செய்திருந்தார்.

அதில், "தமிழ்நாட்டில் கரோனா நோய்த் தொற்று பரவுவதைத் தடுப்பதற்காக மார்ச் 23ஆம் தேதி முதல் ஊரடங்கு அறிவிக்கப்பட்டுள்ளது.

இந்நிலையில், டாஸ்மாக் கடைகளைத் திறக்க தமிழ்நாடு அரசு நடவடிக்கை எடுத்தது. டாஸ்மாக் கடைகளைத் திறந்ததால் நோய்த் தொற்று பரவல் சமூக பரவல் நிலையை அடைந்திருக்குமோ என்ற அச்சம் ஏற்பட்டுள்ளது.

மது அருந்துதல் நோய் எதிர்ப்பாற்றலை குறைக்கும் நிலையில் மது பயன்படுத்துவோர் எளிதாகக் கரோனா நோய்த் தொற்றால் பாதிக்கப்படும் அபாயம் ஏற்படும். ஆகவே, இவற்றைக் கருத்தில் கொண்டு தமிழ்நாடு அரசு டாஸ்மாக் கடைகளைத் திறக்க தடை விதித்து உத்தரவிட வேண்டும்" எனக் கூறியிருந்தார்.

இந்த வழக்கு நீதிபதிகள், பி.என்.பிரகாஷ், புகழேந்தி அமர்வு முன்பு காணொலி காட்சி வாயிலாக இன்று விசாரணைக்கு வந்தது.

அப்போது அரசுத்தரப்பில்,"சென்னை உயர்நீதிமன்றம் ஏற்கனவே டாஸ்மாக் கடைகளைத் திறக்க தடை விதித்துள்ளது. அதனை எதிர்த்து உச்ச நீதிமன்றத்தில் மேல்முறையீடு செய்யப்பட்டுள்ளது" எனத் தெரிவிக்கப்பட்டது.

அதற்கு மனுதாரர் தரப்பில் ஆஜரான மூத்த வழக்கறிஞர் வீரகதிரவன் ,"உயர் நீதிமன்றத்தில் விசாரணைக்கு வந்த வழக்கில் வைக்கப்பட்ட கோரிக்கையும், இந்த வழக்கின் கோரிக்கையும் ஒன்றாக இருப்பினும், அதற்கான காரணங்கள் வேறாக உள்ளது.

சமூக இடைவெளி பின்பற்றப்படாது என்பதால் தடை கோரப்பட்டது. அரசுத் தரப்பில் சமூக இடைவெளியை முறையாகப் பின்பற்றும் வகையில், நடவடிக்கை எடுக்கப்படும் என உறுதி அளிக்கப்பட்டதை அடுத்து டாஸ்மாக் கடைகளைத் திறக்க அனுமதி அளிக்கப்பட்டது.