மத்திய அரசால் கொண்டுவரப்பட்டுள்ள குடியுரிமை சட்டத்திருத்தத்தைக் கண்டித்து நாடு முழுவதும் பொதுமக்கள் போராடிவருகின்றனர். நேற்று இரவு டெல்லி பல்கலைக்கழக மாணவர்கள் காவல் துறையினரால் தாக்கப்பட்ட பின், பல்வேறு தரப்பினர் மத்தியிலும் இந்தப் போராட்டம் தீவிரமடைந்துள்ளது. இதன் ஒரு பகுதியாக தமிழ்நாட்டில் பல்வேறு பகுதிகளிலும் அனைத்திந்திய மாணவர் சங்க அமைப்பினர் ரயில் மறியல் போராட்டத்தில் ஈடுபட்டனர்.
இதன் ஒருபகுதியாக கோவை ரயில் மறியல் போராட்டத்தில் ஈடுபட்டவர்கள் சேவ் டெமாக்ரசி, சேவ் எஜுகேசன் என முழக்கங்கள் எழுப்பியதோடு, குடியுரிமை சட்டத்திருத்தத்தை திரும்பப்பெற வலியுறுத்தினர். அதையடுத்து ரயில் மறியல் போராட்டத்தில் ஈடுபட்டவர்களை காவல் துறையினர் கைது செய்தனர்.
இதேபோல் மதுரை ரயில் நிலையத்தை முற்றுகையிட முயன்ற இந்திய ஜனநாயக வாலிபர் சங்கத்தைச் சேர்ந்தவர்களுக்கும் காவல் துறையினருக்கும் இடையே தள்ளுமுள்ளு ஏற்பட்டது. இதில் பெண்கள் உட்பட 47 பேரை காவல் துறையினர் கைது செய்தனர்.
இதேபோல் திருவாரூர் மாவட்டத்தில் இந்திய மாணவர் சங்கத்தினர் எர்ணாகுளம் விரைவு ரயிலை மறித்து போராட்டத்தில் ஈடுபட பேரணியாக வந்தனர். அதனால் அவர்களைத் தடுத்து நிறுத்திய காவல் துறையினருக்கும் மாணவர்களுக்கும் இடையே தள்ளுமுள்ளு ஏற்பட்டது.
தொடர்ந்து பேரணியாக வந்த மாணவர்கள் காவல் துறையினரின் தடுப்புகளை மீறி, தண்டவாளத்தில் அமர்ந்து மத்திய அரசுக்கு எதிராக கண்டன முழக்கங்களை எழுப்பினர். மேலும் போராட்டத்தில் ஈடுபட்ட 50-க்கும் மேற்பட்ட மாணவர்களை காவல் துறையினர் கைது செய்னர்.
இதையும் படிங்க: குடியுரிமை சட்டத்திருத்த மசோதாவுக்கு எதிராக போராட்டத்தை அறிவித்த அஸ்ஸாம் அரசு பணியாளர்கள்
