முன்னாள் எம்எல்ஏ அப்பாவு உயர் நீதிமன்ற மதுரைக் கிளையில் ஒரு மனுவினைத் தாக்கல் செய்திருந்தார். அதில், 'நெல்லை மாவட்டம் பணகுடி அருகே 5 கிலோ மீட்டர் தொலைவில் ஆலந்துறை ஆறு அணைக்கட்டு அமைந்துள்ளது. இந்த அணைக்கட்டு மூலம் பணகுடி சுற்றுவட்டாரத்தில் சுமார் 20 கிராமங்கள், 52 குளங்கள் மூலமாக பாசனவசதி பெறுகின்றன. ஆலந்துறை ஆறு அணைக்கட்டு , கன்னியாகுமரி மாவட்ட வனப்பகுதியில் அமைந்துள்ளது.
நாகர்கோவில் பொதுப்பணித்துறை இதனை நிர்வகித்து வருகிறது. கடந்த ஆகஸ்ட் 23ஆம் தேதி விவசாயிகள் அனைவரும் சேர்ந்து நாகர்கோவில் பொதுப்பணித்துறை செயற்பொறியாளரை சந்தித்து கால்வாயை தூர்வார அனுமதி கோரினர். வனப்பகுதிக்குள், விவசாயிகளையும் டிராக்டரையும் அனுமதிப்பதாகவும் , மண் அள்ளும் இயந்திரத்தை கொண்டு செல்லக்கூடாது என வன அலுவலர்கள் மறுத்துவிட்டனர். தூர்வாராமல் இருந்தால் எங்கள் பகுதியில் விவசாயம் முற்றிலும் பாதிக்கப்படும் அபாயம் உள்ளது. எனவே வனப்பகுதியில் , வன உயிரினங்கள் சுற்றுச்சூழல் பாதிக்காத வகையில், மண் அள்ளும் இயந்திரத்தை பயன்படுத்தி தூர்வார அனுமதி வழங்க உத்தரவு பிறப்பிக்க வேண்டும்' எனக் குறிப்பிட்டிருந்தார்.
இந்நிலையில், இவ்வழக்கு நீதிபதிகள் சிவஞானம், தாரணி அமர்வில் விசாரணைக்கு வந்தது. அப்போது அரசுத்தரப்பில், கோதையாறு மண்டல பொதுப்பணித்துறை செயற்பொறியாளர் மற்றும் கன்னியாகுமரி மாவட்ட வன அலுவலர் ஆகியோர் உரிய நடவடிக்கை எடுத்து, ஆலந்துறை ஆறு அணைக்கட்டு பகுதியை தூர்வாரி, முறையாக தண்ணீர் செல்ல வழிவகை செய்யவிருப்பதாகவும், இதற்காக 4 லட்ச ரூபாய் ஒதுக்கீடு செய்யப்பட்டிருப்பதாகவும் தெரிவிக்கப்பட்டது.
இதனையடுத்து நீதிபதிகள் ஆலந்துறை ஆறு அணைக்கட்டை தூர்வாரும் பணி குறித்த நிலை அறிக்கையை புகைப்படங்களுடன் தாக்கல் செய்ய நெல்லை மாவட்ட ஆட்சியருக்கு உத்தரவிட்டு இந்த வழக்கை நவம்பர் 4 ஆம் தேதிக்கு ஒத்திவைத்தனர்.
