காஞ்சிபுரத்தில் அமைந்துள்ள செல்போன் உதிரிபாக நிறுவனத்தில் இருந்து கடந்த அக்டோபா் மாதம் 21ஆம் தேதி மும்பை நோக்கி கன்டெய்னர் லாரியில் கொண்டு செல்லப்பட்ட 15 கோடி ரூபாய் மதிப்பிலான 13 ஆயிரத்து 920 செல்போன்களை கிருஷ்ணகிரி மாவட்டம் மேலுமலை அருகே அடையாளம் தெரியாத கும்பல் ஒன்று வழிமறித்து கொள்ளையடித்துச் சென்றது.
இந்த கொள்ளை கும்பலை பிடிக்க 20 பேர் கொண்ட தனிப்படை போலீசார் டெல்லி, மத்தியப் பிரதேசம், திரிபுரா உள்ளிட்ட மாநிலங்களில் தீவிர தேடுதல் வேட்டையில் ஈடுபட்டனர். தனிப்படை போலீசார் நடத்திய தீவிர தேடுதல் வேட்டையில் முக்கிய குற்றவாளியான மத்தியப் பிரதேசத்தை சேர்ந்த ராஜேந்தர்சவுகான் உட்பட 10 பேரை கைதுசெய்தனர்.
செல்போன் கொள்ளையா்களிடம் நடத்திய விசாரணையில் கிருஷ்ணகிரி மாவட்டத்தில் செல்போன்களை கொள்ளையடித்த பின் 33 முறை வாகனங்களில் நம்பர் பிளேட்டை மாற்றி மத்தியப் பிரதேசம் சென்றதாகவும், கொள்ளையடித்த செல்போன்களை போபாலில் இருந்து 2000 செல்போன்கள் வீதம் பிரித்து டெல்லி, கொல்கத்தா, மும்பை, கவுகாத்தி, ராய்பூர் பகுதிக்கு விமானம் மூலம் அனுப்பி உள்ளனா்.
அனைத்து செல்போன்களை அந்த பகுதியில் இருந்து திரிபுரா மாநிலத்திற்கு அனுப்பியதாக தெரிவித்து உள்ளனர். பின்னர் திரிபுராவில் இருந்து சாலை மார்க்கமாக வங்கதேசம் நாட்டிற்கு அனுப்பி உள்ளனர். செல்போன்களை விற்ற பணம் ஹவாலா பணமாக துபாயை சேர்ந்த அப்பாஸ் என்பவர் மூலம் 6.5 கோடி பெற்றுள்ளனர்.
இதுகுறித்து நேற்று (டிச.06) செய்தியாளர்களைச் சந்தித்த மாவட்ட காவல் கண்காணிப்பாளர் பண்டி கங்காதர், தமிழ்நாடு, மத்தியப் பிரதேசத்தை கடந்து வங்கதேசம் துபாய் நாடுகளை சேர்ந்த கொள்ளை கும்பலும் இந்த குற்றச்சம்பவத்தில் ஈடுபட்டு உள்ளதால் மேலும் 15க்கும் மேற்பட்ட குற்றவாளிகளை கைது செய்ய வேண்டிய சூழல் உள்ளது. முக்கிய குற்றவாளியான துபாயை சேர்ந்த அப்பாஸ் என்பவரை கைது செய்யும் முயற்சியில் ஈடுபட்டு உள்ளோம்” என்றார்.
இந்த கொள்ளை வழக்கில் சாமர்த்தியமாக செயல்பட்டு ஒரு மாதத்தில் முக்கிய குற்றவாளிகளை கைது செய்த கூடுதல் காவல் கண்காணிப்பாளர் சக்திவேல் தலைமையிலான தனிப்படை குழுவுக்கு மாவட்ட காவல் கண்காணிப்பாளர் பாராட்டுகளை தெரிவித்தார்.
