மனைவியின் கழுத்தறுத்துக் கொலைசெய்த கணவன் கைது

கிருஷ்ணகிரி: குடும்பத் தகராறில் கத்தியால் மனைவியின் கழுத்தறுத்துக் கொலைசெய்த கணவனைக் காவல் துறையினர் கைதுசெய்தனர்.

கிருஷ்ணகிரி மாவட்டம் வேப்பனப்பள்ளி அருகே உள்ள கங்கோஜிகொத்தூர் கிராமத்தைச் சேர்ந்தவர் நாடராஜன் (39). கார் டிரைவரான இவர் சில ஆண்டுகளுக்கு முன்பு சென்னையைச் சேர்ந்த பிரியா (35) என்பவரைக் காதலித்து திருமணம் செய்துகொண்டு பெங்களூருவில் வாழ்ந்துவந்தார். இவர்களுக்கு நான்கு வயதில் கோயல் என்ற மகன் உள்ளார். இந்த நிலையில் கடந்த சில மாதங்களுக்கு முன்பு பெங்களூருவிலிருந்து வந்து கங்கோஜிகொத்தூரிலுள்ள நடராஜனின் தாயார் வீட்டில் வசித்துவந்தனர்.

சில நாள்களாக கணவன், மனைவி இருவருக்கும் இடையே தகராறு இருந்து வந்ததாகவும் அதனால் கடந்த வாரம் பிரியா நடராஜனுடன் கோபித்துக்கொண்டு ஓசூர் சென்றுவிட்டதாகக் கூறப்படுகிறது. இதைத் தொடர்ந்து மனைவியை சமாதானம் செய்து வீட்டிற்கு அழைத்துள்ளார். வீட்டிற்கு வந்த பின்னர் பிரியாவுடன் மீண்டும் தகராறு ஏற்பட்டுள்ளது. இதில் ஆத்திரமடைந்த நடராஜன், பிரியாவை அருகில் இருந்த கத்தியைக் கொண்டு கழுத்தை அறுத்துள்ளார். இதில், சம்பவ இடத்திலேயே பிரியா இறந்துள்ளார்.

மனைவியைக் கொலைசெய்துவிட்டு ஒன்றும் தெரியாததுபோல நடராஜன் இருந்துள்ளார். இதனைக் கண்டு சந்தேகமடைந்த அப்பகுதி பொதுமக்கள் காவல் துறைக்கு தகவல் தெரிவித்தனர். தகவலறிந்து வந்த காவல் துறையினர், நடராஜனிடம் விசாரணை நடத்தினர். விசாரணையில் நடராஜன் மனைவியைக் கொலைசெய்ததை ஒப்புக்கொண்டார். இதையடுத்து பிரியாவின் உடலைக் கைப்பற்றி நடராஜனைக் கைதுசெய்தனர். மேலும் பிரியாவின் உடலை கிருஷ்ணகிரி அரசு மருத்துவமனைக்கு உடற்கூறாய்வுக்காக அனுப்பிவைத்தனர்.

இதையும் படிங்க: நிலைமை மோசமாவதற்குள் இந்தியர்களைக் காப்பாற்றுங்கள் - ஜப்பான் கப்பலிலிருந்து தமிழர் கோரிக்கை!