கிருஷ்ணகிரி: ஒசூர் அடுத்த மதகொண்டப்பள்ளி கிராமத்தின் பின்புறமாக ஞாயிற்றுக்கிழமை இரவு இரண்டு சமூகத்தைச் சேர்ந்த இளைஞர்கள் இருபிரிவாகத் தனித்தனியாக அமர்ந்து மது அருந்தி வந்துள்ளனர்.
அப்போது இருதரப்பினருக்கு இடையே வாய்தகராறு ஏற்பட்டு கைக்கலப்பாக மாறி உள்ளது. அப்போது குடிபோதையில் மதுப்பாட்டில்களில் குத்தியதில் 3 இளைஞர்கள் படுகாயமடைந்து ஒசூர் தனியார் மருத்துவமனைக்கு கொண்டுவரும் வழியில் சசிகுமார் (25) என்ற இளைஞர் உயிரிழந்தார். மேலும் இரண்டு இளைஞர்கள் காயங்களுடன் மருத்துவமனையில் அனுமதிக்கப்பட்டனர்.
சசிகுமார் பலத்த காயங்களுடன் உயிரிழந்த நிலையில், எதிர் தரப்பைச் சேர்ந்த 7 பேரை தளி காவல் துறையினர் வன்கொடுமை தடுப்புச் சட்டத்தின் கீழ் வழக்குப்பதிவு செய்து தேடி வந்தநிலையில் பிரசன்னா, முரளி, ராஜசேகர், சண்முகம், கிரீஷ், சசிதர், மோகன் ஆகிய 7 பேரை கைதுசெய்து ஒசூர் நீதிமன்றத்தில் ஆஜர்படுத்தினர்.
நீதிபதி 7 பேரையும் ஒசூர் கிளை சிறையில் அடைக்க உத்தரவிட்டதைத் தொடர்ந்து அவர்களை சிறையில் அடைத்தனா்.
