முதலமைச்சர் ஜெயலலிதாவின் மறைவுக்கு பிறகு அக்கட்சியில் ஏற்பட்ட சலசலப்பில், அதிமுகவில் இருந்து விலகி அமமுகவின் டிடிவி தினகரன் தலைமையை ஏற்று கட்சி மாறினார், செந்தில் பாலாஜி. கரூர் எம்.எல்.ஏ.வாக இருந்த செந்தில்பாலாஜி கொறடா உத்தரவை மீறியதால் தகுதி நீக்கம் செய்யப்பட்டார். அங்கிருந்து சில நாள்களில் திமுக தலைவர் மு.க. ஸ்டாலின் தலைமையை ஏற்று திமுகவில் தன்னை இணைத்துக் கொண்டார்.
திமுகவில் இணைத்துக்கொண்ட 40 நாட்களில் செந்தில் பாலாஜிக்கு கரூர் மாவட்ட திமுக பொறுப்பாளர் பொறுப்பு வழங்கப்பட்டது. கடந்த 2019ஆம் ஆண்டு நடைபெற்ற மக்களவைத் தேர்தலில், கரூர் மக்களவை தொகுதியில் கூட்டணி கட்சியான காங்கிரஸ் கட்சிக்கு ஒதுக்கப்பட்டது. இரண்டு முறை அத்தொகுதியில் போட்டியிட்டு தோல்வியுற்ற ஜோதிமணிக்கு மீண்டும் வாய்ப்பு வழங்கப்பட்டது. அத்துடன் அரவக்குறிச்சி இடைத்தேர்தலில் செந்தில் பாலாஜி திமுக சார்பில் போட்டியிட வாய்ப்பு வழங்கப்பட்டது.
ஒரே நேரத்தில் கரூர் மாவட்டத்தில் நடைபெற்ற அரவக்குறிச்சி இடைத்தேர்தல், மக்களவை தேர்தல் பணியை தான் வேட்பாளராக இருந்த போதும், செந்தில் பாலாஜி சிரத்தையோடு செய்தார். சுமார் 4 லட்சத்திற்கும் மேற்பட்ட வாக்குகள் வித்தியாசத்தில் காங்கிரஸ் வேட்பாளர் ஜோதிமணியை வெற்றிபெறவும் வைத்தார். தொடர்ந்து, 2020ஆம் ஆண்டு நடைபெற்ற உள்ளாட்சித் தேர்தலிலும் கரூர் மாவட்டத்தில் குறிப்பிட்டளவு கணிசமான இடங்களை திமுக கைப்பற்றியது.
ஸ்டாலின் புகழாரம்
கரோனா நிவராண பொருட்கள் வழங்குவது, திமுக மக்கள் கிராம சபை கூட்டம், விடியலை நோக்கி ஸ்டாலின் குரல் என அனைத்து கட்சிப் பணிகளிலும் திராவிட முன்னேற்றக் கழகத்தில் உள்ள மாவட்ட செயலாளர்களுக்கு முன்னுதாரணமாக, செந்தில்பாலாஜி பணியாற்றி வருகிறார் என திமுக தலைவர் ஸ்டாலினால் புகழப்பட்டார்.
நடந்து முடிந்த சட்டப்பேரவை தேர்தலில், தீவிர பரப்புரை மேற்கொண்டு கரூரில் அதிக வாக்குகள் வித்தியாசத்தில் நான்கு தொகுதிகளிலும் திமுகவை வெற்றி பெறச் செய்துள்ளார் செந்தில்பாலாஜி.
ஸ்டாலினுடனான சந்திப்பு
பின்னர், மே 3ஆம் தேதி சென்னை கலைஞர் அறிவாலயத்தில் அரவக்குறிச்சி தொகுதியில் வெற்றிபெற்ற இளங்கோ, கிருஷ்ணராயபுரம் தனி தொகுதியில் வெற்றிபெற்ற சிவகாமசுந்தரி, குளித்தலை தொகுதியில் வெற்றிபெற்ற மாணிக்கம் ஆகியோருடன் செந்தில் பாலாஜியும் திமுக தலைவர் ஸ்டாலினை சந்தித்து வெற்றி சான்றிதழை காண்பித்து ஆசிபெற்றனர்.
நான்கு சட்டப்பேரவைத் தொகுதிகளிலும் வெற்றி பெற வைப்பதாக திமுக தலைவரிடம் கொடுத்த வாக்குறுதியை நிறைவேற்றிய செந்தில்பாலாஜி, திமுகவில் தனக்கென ஒரு முக்கிய இடத்தை உருவாக்கியுள்ளார்.
கரூர் மாவட்டத்தில் குளித்தலை, அரவக்குறிச்சி என இரண்டு சட்டப்பேரவைத் தொகுதிகளில் மட்டுமே தன்வசம் வைத்திருந்த திமுக, அதிமுக வசமிருந்த கரூர், கிருஷ்ணராயபுரம் ஆகிய இரண்டு தொகுதிகளையும் தட்டிப் பறித்துள்ளது. இதற்கு முக்கிய காரணம் செந்தில்பாலாஜி.
அதற்கான பரிசாக வரும் மே 7ஆம் தேதி நடைபெறும் பதவியேற்பு விழாவில் அவருக்கு முக்கிய அமைச்சர் பதவி வழங்கப்படுவதாக தகவல் கசிந்துள்ளது. ஒவ்வொரு முறையும் செந்தில்பாலாஜி தேர்தல் களத்தில் பல்வேறு உத்திகளைக் கையாண்டு வெற்றிக்கனியை பறித்து வருகிறார்.
இதையும் படிங்க:பரமக்குடியில் மநீம தோற்றதற்கு கமல்தான் காரணம்: வெளியான உண்மைகள்!
