கரூர் நகராட்சிப் பகுதி மக்களின் பயன்பாட்டுக்காக எம்பியின் தொகுதி மேம்பாட்டு நிதியிலிருந்து ஒதுக்கப்பட்ட நிதியை பயன்படுத்தாமல் நகராட்சி நிர்வாகம் புறக்கணித்து வருவதாக கூறி நகராட்சி ஆணையர் அலுவலகத்தில் இன்று(ஆகஸ்ட் 10) காலை முதல் கரூர் மக்களவை உறுப்பினர் ஜோதிமணி உள்ளிருப்புப் போராட்டம் நடத்திவந்தார்.
இதனால், நகராட்சி ஆணையர் அலுவலகத்தில் சிறிது நேரம் பரபரப்பு நிலவியது. இதனிடையே செய்தியாளர்களிடம் பேசிய அவர், " கரூர் நகராட்சியில் வெங்கமேடு பகுதியில் ஜாமியா நகர் பகுதியில் தார்சாலை அமைக்க 9.15 லட்சம் ரூபாய், சின்ன ஆண்டாள் கோயில் பகுதியில் பெண்களுக்கு அத்தியவாசியமான கழிப்பறைக் கட்டடம், கரூர் நகராட்சிக்கு உட்பட்ட மார்னிங் ஸ்டார் பள்ளியின் மேம்பாட்டுப் பணிகள், ரயில் நிலையத்தில் பேருந்து நிறுத்தம் அமைப்பது உள்ளிட்ட பணிகளுக்காக எம்பி நிதியில் இருந்து மார்ச் மாதம் 17.15 லட்சம் ரூபாய் நிதி ஒதுக்கினேன்.
இருப்பினும், நகராட்சி நிர்வாகம் பல்வேறு காரணங்களை கூறி இந்த நிதியை பயன்படுத்தாமல் புறக்கணத்து வருகிறது. மக்கள் வரிப்பணத்தை மக்களுக்காக செயல்படுத்த உறுதிப்படுத்தப்பட்ட வேண்டிய இடத்தில் நான் இருக்கிறேன். ஆளுங்கட்சி அமைச்சரின் தலையீடு காரணமாக எம்பி நிதி கரூரில் புறக்கணிக்கப்பட்டு வருகிறது. எம்பி நிதியை முழுமையாக பயன்படுத்த திட்டம் போடும்வரை உள்ளிருப்பு போராட்டம் தொடரும்" என்றார்.
இதன்பின்னர் அவரிடம் பேசிய நகராட்சி அலுவலர்கள், குறைவான நிதி ஒதுக்கப்பட்டுள்ளதால் திட்டம் போடவில்லை என்று தங்கள் தரப்பு விளக்கத்தை அளித்தனர். மேலும், அதிக நிதி ஒதுக்கப்பட்டால் உடனடியாக திட்டங்கள் தீட்டப்பட்டு பணிகள் தொடங்கப்படும் என அவர்கள் உறுதியளித்ததையடுத்து மாலை 5 மணியளவில் உள்ளிருப்புப் போராட்டத்தை அவர் கைவிட்டார்.
இதையும் படிங்க: 'மத்திய அரசின் சுற்றுச்சூழல் சட்டத்தை எதிர்க்க வேண்டும்'- எம் பி ஜோதிமணி!
